Birinshi ótinishti 11–16 sáýir aralyǵynda, al ekinshisin 17–25 sáýir aralyǵynda úmitkerdiń qalaýy boıynsha tapsyrýǵa bolady. Testileýdiń ózi 10 mamyrdan 10 shildege deıingi kezeńde ótedi.
UBT-ǵa qatysýǵa ótinish Ulttyq testileý ortalyǵynyń saıty nemese UTO.kz qosymshasy arqyly beriledi. Talapkerlerge testileý kúnin, ýaqytyn jáne ornyn tańdaý múmkindigi beriledi. Sonymen qatar olar eki múmkindik úshin bir ǵana beıindik pánder kombınasııasyn tańdaı alady.
Negizgi UBT-ǵa daıyndyq deńgeıin arttyrý úshin qańtar jáne naýryz aılaryndaǵy UBT-dan ótken talapkerlerge ár pán boıynsha jeke taqyryptyq taldaý usynylǵan. Iаǵnı, ár UBT-dan keıin (qańtar, naýryz) túlekter álsiz taqyryptaryn jetildirip, daıyndalýǵa múmkindik alady. Sondaı-aq birinshi múmkindikten keıin ekinshi testileýge daıyndyqtaryn jaqsartýǵa ýaqyt beriledi.
Qosymsha retinde Ulttyq testileý ortalyǵynyń saıtynda synaq testteri iske qosylady.
Emtıhan kezinde testileý baǵdarlamasynda kalkýlıator, hımııalyq elementterdiń perıodtyq júıesi jáne tuzdardyń erigishtik kestesi qoljetimdi bolady. Qosymsha túrde talapkerlerge yńǵaıly bolý úshin kestelerdiń qaǵaz nusqalary beriledi.
Apellıasııaǵa talapkerler testileý aıaqtalǵannan keıin 30 mınýt ishinde ótinish bere alady. Apellıasııa bergen talapkerdiń sertıfıkaty apellıasııalyq komıssııa sheshimi qabyldanǵannan keıin jeke kabınette qoljetimdi bolady.
Oqýǵa túsý úshin eń tómengi shekti baldar ózgerissiz qalady:
- ulttyq joǵary oqý oryndaryna — 65 ball;
- basqa joǵary oqý oryndaryna — 50 ball;
- «Pedagogıkalyq ǵylymdar» bilim berý salasy boıynsha — 75 ball;
- «Densaýlyq saqtaý» salasy boıynsha — 70 ball;
- «Quqyq» baǵyty boıynsha — 75 ball.
Sonymen qatar «Qazaqstan tarıhy» jáne eki beıindik pán boıynsha UBT jáne shyǵarmashylyq emtıhannan keminde 5 ball, al «Oqý saýattylyǵy» men «Matematıkalyq saýattylyq» pánderinen keminde 3 ball jınaý qajet. Aıta ketý kerek, joǵary oqý oryndary bilim berý baǵdarlamalary toptary boıynsha ózderiniń shekti baldaryn belgileı alady.
Qaýipsizdikti qamtamasyz etý jáne quqyq buzýshylyqtardyń aldyn alý maqsatynda testileýge kirer kezde telefon, shpargalka sııaqty tyıym salynǵan zattardy ótkizbeý úshin qol jáne ramkaly metall izdegishter qoldanylady.
Testileý aýdıtorııalarynda ruqsat etilgen magnıttik tolqyndar sheginde uıaly jáne radıoelektrondyq baılanys sıgnaldaryn basý qurylǵylary paıdalanylady, sondaı-aq beınebaqylaý júrgiziledi.
UBT-2026 aıaqtalǵannan keıin 31 qazanǵa deıin beınejazbalarǵa taldaý júrgiziledi. Tyıym salynǵan zattardy qoldaný nemese erejelerdi buzý faktileri anyqtalǵan jaǵdaıda talapkerdiń UBT nátıjeleri joıylady.
