Is-sharaǵa Qazaqstan Respýblıkasy Mádenıet jáne aqparat mınıstrliginiń, IýNESKO Hatshylyǵynyń, Qazaqstan Respýblıkasynyń IýNESKO jáne ISESKO isteri jónindegi ulttyq komıssııasynyń, sarapshylar qaýymdastyǵy men elimizdiń óńirleriniń ókilderi qatysty.
Is-shara 2025-2026 jyldarǵa arnalǵan IýNESKO-nyń Tehnıkalyq granty aıasynda júzege asyrylyp jatqan eki kúndik baǵdarlamanyń alǵashqy kúni sheńberinde ótti. Qazirgi ýaqytta grant pılottyq rejımde Qazaqstannyń bes óńirinde – Jetisý, Atyraý, Shyǵys Qazaqstan, Qaraǵandy jáne Qyzylorda oblystarynda iske asyrylýda. Atalǵan óńirlerde grantty tıimdi basqarýdy qadaǵalap, onyń oryndalýyna turaqty monıtorıng júrgizetin arnaıy jumys toptary qurylǵan.
Jıynda QR Premer-mınıstriniń orynbasary – Mádenıet jáne aqparat mınıstri Aıda Balaeva ulttyq mádenı dástúrlerdi júıeli túrde memlekettik qoldaýdyń mańyzyn atap ótip, osy baǵytta naqty praktıkalyq sheshimder ázirleý qajettigine toqtaldy.
О́ńirler aldynda qazaqtyń dástúrli mádenıetiniń umyt qalǵan elementterin jańǵyrtý jáne olardy keńinen nasıhattaýdyń zamanaýı tásilderin, sonyń ishinde sıfrlyq medıany engizý mindeti tur.
«Memleket basshysy Ulttyq quryltaı otyrysynda atap ótkendeı, shynaıy otanshyldyq naqty isten, týǵan jerge degen súıispenshilikpen jáne qoǵamǵa qyzmet etýge daıyn bolýdan kórinedi. Otbasynda uqyptylyqpen saqtalyp, urpaqtan urpaqqa jalǵasyp kele jatqan biregeı mura memleket tarapynan naqty qoldaýǵa ıe bolyp, zamanaýı mádenı ortada tolyqqandy damýy qajet. 2003 jylǵy Konvensııa materıaldyq emes mura tujyrymdamasy retinde Qazaqstan qoǵamynyń qundylyqtarymen tolyq úndesedi», dedi Aıda Balaeva.
IýNESKO-nyń 2003 jylǵy Konvensııa Hatshylyǵynyń basshysy Fýmıko Ohınata halyqaralyq kómek tetiginiń Konvensııany iske asyrýdaǵy negizgi quraldardyń biri retindegi mańyzyn erekshe atap ótti.
«Qazaqstannyń materıaldyq emes mádenı murasynyń ulttyq tizimi jańartylyp, eldiń ártúrli óńirlerindegi jergilikti qaýymdastyqtardyń áleýeti nyǵaıtylǵanyn kórý – qýanyshty jaıt. Biz qazaqstandyq memlekettik organdar men qaýymdastyqtardyń jumysyn joǵary baǵalaımyz jáne bul tájirıbe ózge elderdi de halyqaralyq kómek tetigin belsendirek paıdalanýǵa yntalandyrady dep senemiz», dedi Fýmıko Ohınata.
Talqylaý qorytyndysy boıynsha dóńgelek ústel barysynda aıtylǵan usynystar júıelendirilip, aldaǵy jumysta eskeriletini atap ótildi.
Búginde IýNESKO jobasynyń birinshi kezeńin iske asyrý aıasynda qoldanystaǵy Ulttyq tizimdegi 79 elementtiń 56-sy qujattalǵan, materıaldyq emes mádenı muranyń 277 ıesimen suhbat júrgizilgen.
Sonymen qatar bes pılottyq óńirde oqytý semınarlary ótkizildi. Qazirgi ýaqytta Qazaqstannyń materıaldyq emes mádenı mura ıeleriniń ınteraktıvti derekter bazasyn jasaý jumysy júrgizilip jatyr.
Sondaı-aq eki salalyq seksııa ótip, onda aýyzsha jáne epıkalyq mura máseleleri, beıindi mamandar daıarlaý, qujattyq murany damytý, ony sıfrlandyrý jáne qorlarǵa qoljetimdilikti keńeıtý, sondaı-aq balalar men jasóspirimderdi tárbıeleýde dástúrli oıyndar men folklorlyq saıystardy paıdalaný máseleleri talqylandy.
Baǵdarlamanyń ekinshi kúnine pılottyq óńirlerdiń oblystyq býyn basshylaryna arnalǵan jabyq oqytý semınary, jergilikti deńgeıde materıaldyq emes mádenı mura elementterin aıqyndaý jáne damytý jónindegi semınar-brıfıng, sondaı-aq IýNESKO-nyń Tehnıkalyq grantyn iske asyrýǵa arnalǵan jumys keńesi josparlanǵan.
