«UAE SWAT Challenge» – taktıkalyq operasııalar, ǵımarat pen munarany basyp alý, kepilge alynǵandardy jáne ofıserlerdi qutqarý, sondaı-aq keshendi kedergiler jolaǵynan ótý sekildi bes kúrdeli kezeńnen turatyn halyqaralyq jarys. Bul syn alańynda kúsh pen shapshańdyq qana emes, komandalyq rýh pen strategııalyq sheshim qabyldaý da qajet. Eldiń namysyn qorǵaǵan arnaıy jasaq álemniń nazaryn ózine osylaı qaratty. Bul – árıne, oblystyq polısııa departamentiniń jyldam qımyldaıtyn arnaıy jasaǵynyń aǵa ınspektory, polısııa kapıtany, mergen Ámirhan Mahatov pen Qaraǵandy qalasyndaǵy 5450 áskerı bólim kapıtany, mergen Erdáýlet Janǵalı sekildi jigitterdiń myǵym daıyndyǵymen, qaısar rýhymen kelgen jeńis.
Aǵa ınspektor Ámirhan Ersaıynulynyń bul – alǵashqy aýqymdy dodasy emes. Ol – tájirıbelik atýdan sport sheberligine úmitker, respýblıkalyq jáne halyqaralyq týrnırlerdiń jeńimpazy. Munymen qosa jastaıynan dzıýdomen jattyǵyp, bul sport túrinen de talaı básekede top jardy.
«Arnaıy bólimsheler arasyndaǵy bul jarys – mergendik pen jyldamdyqtyń ǵana emes, temirdeı tártip pen minsiz komandalyq úılesimniń synaǵy. Baǵdarlama bes kúrdeli kezeńnen turady, árqaısysy shynaıy operasııaǵa barynsha jaqyndatylǵan. Alǵashqy jattyǵýda bir mergen men tórt shabýyldaýshy kólikten túsip, kedergilerden ótip, ǵımaratqa shabýyl jasaıdy. Mergen myltyqpen jáne tapanshamen atyp, topqa belgi beredi. Sońynda nysanalardy ár qalypta kózdep, shartty túrde jaralanǵandardy tasymaldaýmen aıaqtalady», deıdi mergen Ámirhan Ersaıynuly.
Ekinshi kezeń – kepilge alynǵan adamdy bosatý. Mergen 60 metr qashyqtyqtaǵy nysanany bir oqpen qulatýǵa tıis. Sol sátten bastap shabýyl toby ǵımaratqa kirip, bólmelerdegi tek negizgi nysanalardy joıady. Úshinshi jattyǵýda mergen 2 santımetrlik shaǵyn nysanalardy dál ortasynan atýy kerek, al top kedergilerden ótip, birneshe pozısııadan nysanalardy kózdeıdi. Keıin «jaralanǵan» mergendi qutqaryp, aýyr júkti birge tasymaldaıdy. Tórtinshi kezeńde eki mergen men úsh shabýyldaýshy alys qashyqtyqta atyp, kópqabatty ǵımaratta áreket etedi. Bıiktik pen sharshaýǵa qaramastan, tapsyrmany oryndap, ortaq márege jetýge tıis. Besinshi jattyǵý – qarýsyz kedergiler jolaǵy. 21 kedergini búkil komanda birge ótedi, sońǵy adam jetkende ǵana ýaqyt toqtaıdy.
Bul bes synaq dáldik, tózimdilik, taktıkalyq oılaý men komandalyq birlikti qatar tekseredi. Osyndaı kúrdeli tapsyrmalardy sheber oryndap shyqqandardyń biri qaraǵandylyq mergen Erdáýlet Janǵalı edi. Áskerı sala – onyń bala kúngi armany. Teledıdardan áskerı baǵdarlamalardy kórip, «osyndaı forma kıip, elge qyzmet etemin», dep ózine sert berip ósken kórinedi. Búginde sol armany shyndyqqa aınalyp, ol Otan aldyndaǵy jaýapty mindetin adal oryndap júr.
Armany asqaq ol Ulttyq ulan akademııasyna oqýǵa túsedi. Jas ofıser eńbek jolyn Astana qalasyndaǵy 5573 áskerı bóliminde komandır qyzmetinen bastaıdy. Byltyr Qaraǵandy qalasyndaǵy 5450 áskerı bólimine aýysyp kelip, abyroıly qyzmet atqaryp keledi. Sport – onyń ómiriniń ajyramas bóligi. Erdáýlet negizinen shańǵy jarysymen aınalysady. Qysqy prezıdenttik kópsaıys jarystaryna turaqty qatysyp, júldeli oryndar alyp júr. Sonymen qatar jeńil atletıka boıynsha Qaraǵandy oblysynyń chempıony atandy. Qazirgi tańda mergen retinde qyzmet atqarady. Bul baǵytta da óziniń kásibı deńgeıin halyqaralyq jarystarda dáleldep, joǵary nátıjeler kórsetip keledi.
«Jarystyń atmosferasy erekshe. Erejeler qatań, talaptar burynǵydan da kúrdeli bola tústi. Bes kún boıy ár kúnniń óz sharty, óz synaǵy bekitildi. Mergen retinde men úsh qalypta – jatyp, otyryp jáne turyp attym. Ár qalyp dáldik pen turaqtylyqty talap etedi. Nysanalardy oryndaǵan soń birden júgirip kelip, 80 kılolyq manekenderdi kóterip, márege jetkizý kerek. Iаǵnı mergen tek nysana kózdeýmen emes, kúsh pen tózimdilikpen de synaldy. Ekinshi kúni bes qabatty ǵımaratqa kóterilip, 60 metr qashyqtyqtaǵy nysanany bir oqpen qulatý tapsyryldy. Sol bir oq búkil komandanyń qozǵalysyn sheshedi – nysana qulamaıynsha top alǵa jyljymaıdy. Bul úlken jaýapkershilik júkteıdi. Úshinshi kún eń qıyn kezeńderdiń biri boldy: 60 metr qashyqtyqta dıametri 3 santımetrlik qara sheńberdiń dál ortasyna tórt ret tıgizý kerek. Az ǵana qatelik – nátıje eseptelmeıdi. Tórtinshi kúni qashyqtyq uzardy: aldymen 100 metrden úsh nysana, keıin besinshi qabatqa kóterilip, 300 metrden eki nysanany atýymyz kerek. Sharshaǵan kúıde dáldik saqtaý ońaı emes. Besinshi kún – kúsh pen namystyń synaǵy. Qarýsyz kedergiler jolaǵy, joǵary júkteme, tek komandalyq rýhqa súıenesiń. Osy bes kúnde biz joǵary nátıje kórsetip, barlyq qıyndyqqa tótep berdik. Sonyń arqasynda jeńiske jettik. Bul – tabandylyq pen birliktiń jeńisi», deıdi Erdáýlet Janǵalı.
Jeńispen oralǵan Qazaqstan quramasyn el aıryqsha qurmetpen qarsy aldy. Komandır Erdáýlet Prezıdent Qasym-Jomart Toqaevtyń qolynan «Jaýyngerlik erligi úshin» medalimen, al Ámirhan Ersaıynuly Memleket basshysynyń Alǵyshaty men Ishki ister mınıstrliginiń «Quqyq tártibin qamtamasyz etýge qosqan úlesi úshin» medalimen marapattaldy.
El komandasynyń jeńiske jetýine úlesterin qosqan qos qaraǵandylyq jaýynger «Kók tý bıikke kóterilgende, kózge eriksiz jas keldi» deıdi. Elge degen mahabbatyń eń bıik kórinisi – osy. Jigerli jigitter men qaıratty qazaq qyzdary – namystyń narkeskenindeı, rýhtyń baıraǵyndaı. Jasa, qazaq jaýyngeri!
Qaraǵandy oblysy
