Jyl saıyn 7 sáýirde Ulttyq ulanda Erlik kúni atalyp ótedi. Bul kún keıingi jas sarbazdarǵa antqa adaldyq pen Otan qorǵaý jolyndaǵy tabandylyqtyń eren úlgisin kórsetetin taǵylym mysaly.
Jyldaǵy dástúrge saı elordamyzda ulandyq jaýyngerler Erlik alleıasyndaǵy «Er esimi – el esinde» monýmentine gúl shoqtaryn qoıyp, «Qazbat» batyrlaryn eske aldy. Is-sharaǵa Ulttyq ulannyń qolbasshylyǵy, jergilikti atqarýshy organdardyń ókilderi, sondaı-aq áskerı qaqtyǵystardyń ardagerleri qatysty.
Jıynǵa qatysýshylar jaýyngerlerdiń erligi men janqııarlyǵyn eske alyp, taǵzym etti.
«7 sáýir – tek eske alý kúni ǵana emes. Bul – erlik rýhyn ulyqtaıtyn, otansúıgishtikti dáripteıtin mańyzdy kún. Biz batyrlarymyzdyń erligin árdaıym maqtan tutamyz. Olardyń rýhy aldynda bas ıemiz», dep atap ótti Ishki ister mınıstriniń orynbasary – Ulttyq ulannyń bas qolbasshysy, general-maıor Ańsaǵan Baltabekov.
KSRO qulaǵan soń, Tájikstanda azamat soǵysy bastalyp, turaqsyzdyq tolqyny búkil Ortalyq Azııaǵa taralý qaýpi týyndaǵan edi. Buǵan arǵy jaqtaǵy Aýǵanstannan zańsyz jolmen kelip jatqan qarý-jaraq aǵyny qosylyp, jaǵdaıdy kúrdelendire tústi. Sonyń ishinde Pıandj ózeni arqyly kontrabanda tasymaly, ásirese esirtki saýdasy sharyqtap turǵan bolatyn. Osy keleńsizdikterge tosqaýyl qoıý úshin Qazaqstan, Reseı, Qyrǵyzstan jáne О́zbekstan birikken bitimgerlik kúshterin quryp, Tájikstan shekarasyn tize qosyp kúzetý týraly sheshim qabyldady. TMD elderiniń ońtústik shebin qorǵaýǵa Ishki áskerdiń 20 rotasy iriktelip, 2 myńǵa jýyq áskerı qyzmetshi oq pen ottyń ortasynda jaýyngerlik qyzmet atqardy.
Sol kezdegi 7-rotanyń komandıri, ardager Erlan Aldanazarovtyń aıtýynsha, 1995 jyldyń naýryz aıynda olar Shymkenttegi jedel maqsattaǵy polkten tájik-aýǵan shekarasyna attanǵan. 6 sáýirde olarǵa Podkýnov shekara zastavasynan Pshıharv shatqalyna barý týraly buıryq beriledi. Maqsat – Pshıharv shatqalynda bir vzvodty qaldyryp, ári qaraı Vısharv shatqalyna eki vzvodty ornalastyrý. Shekara zastavasynan ol jerge deıingi araqashyqtyq – 200–230 shaqyrym.
«Túnimen daıyndalyp, avtokólikterge júkterdi tıedik. Tańǵy astan keıin kolonnamen júrip kettik. Saǵat 12.20-da Pshıharv shatqalyna toqtadyq. Bir kezde taý tóbesine jasyrynǵan sodyrlar bizdiń kolonnany jan-jaǵymyzdan atqylaı bastady», dep eske alady rota komandıri.
Sodyrlar áskerdiń kele jatqanyn aldyn ala bilip, shatqaldyń eń tar jerinde taý tóbelerine jasyrynyp, shabýyl bastaýdy kútip jatsa kerek. Sol jerde birneshe saǵatqa sozylǵan shaıqas bolyp, qazaq jaýyngerleri tuzaqqa tap bolǵanyna qaramastan, keri sheginbeı, jaýdyń betin qaıtara bildi.
Keıin Prezıdent Jarlyǵymen áskerı boryshyn óteý kezinde kórsetken erligi men batyldyǵy úshin II dárejeli «Aıbyn» ordenimen – 5, «Jaýyngerlik erligi úshin» medalimen 12 áskerı qyzmetshi qaza bolǵannan keıin memlekettik nagradalarmen marapattaldy.
Jalpy, 1993 jyldan 2001 jylǵa deıin Tájikstanda shekara kúzetken 43 áskerı qyzmetshi qaza tapsa, 100-den asa bitimger jaraqat aldy.
