Jerlesimiz Gennadıı Golovkın basshylyq etetin «World Boxing» uıymy eresekter arasyndaǵy Azııa chempıonatyn alǵash ret ótkizdi. Áttegen-aıy da, mereıimizdi asyrǵan áserli sátteri de qatar órilgen qurlyq báıgesinde boksshylarymyz senimdi aqtaı aldy ma? Aldymen boıjetkenderimizdiń shyqqan bıigin baǵamdaıyq.
Áıelder quramasynyń bas bapkeri Eldos Saıdalın bastaǵan jattyqtyrýshylar ujymy Mońǵolııada 10 boksshyny dodaǵa qosty. О́kinishke qaraı, Azııa chempıony Rımma Volosenko (60 kg) alǵashqy jekpe-jekte úndistandyq Prııa Prııaǵa ese jiberip, shırek fınalǵa shyǵa almady. Elına Bazarova (54 kg) da alǵashqy asýda súrinip, álem kýboginiń ıegeri, Úndistan boksshysy Prıtıden utyldy. 51 kg salmaqta synǵa túsken Jazıra Oraqbaevaǵa jerebe ońaı bolǵan joq. Birinshi aıqasynda-aq tájirıbeli boksshy, álem chempıonatynyń qola júldegeri soltústikkoreıalyq An Kým-bıolmen judyryqtasty. Qyrsyq shalǵanda birinshi, ekinshi raýndta upaı sanymen alda turǵan jerlesimiz 3-raýndta jaraqaty kedergi bolyp, jekpe-jek toqtatyldy da, An kelesi kezeńge ótip ketti. Laýra Esenkeldiniń (65 kg) de jolyn úndistandyq boksshy bógedi.
Shırek fınaldyq jekpe-jekte tóreshiler Ankýshıta Boro basym tústi dep baǵalady. Azııa chempıonatynyń qola júldegeri Uljan Sársenbektiń (57 kg) shırek fınalda taılandtyq Pýnraýe Rýenrospen joly túıisip, taı qyzy basym tústi. 2024 jyly ótken Azııa chempıonatynyń jartylaı fınalynda da eki boksshy aıqasyp, jerlesimiz ese jibergen bolatyn.
Álem chempıony Valentına Halzova shırek fınaldyq saıysta Ońtústik Koreıa boksshysy Sýıeon Seongty ábden sileletip, 1-raýndtyń ózinde eki márte nokdaýnǵa túsirdi. 2-raýndta ta qarqynǵa qarqyn qosyp tehnıkalyq nokaýtpen jeńdi. Alaıda jartylaı fınaldyq saıysta qytaılyq Zı Baonyń ekpini basym boldy. 2024 jyly jastar arasynda álem chempıony atanǵan Qytaı boksshysy sheberligimen tánti etip, jeńiske jetti. Valentınaǵa Azııa chempıonatynyń qola medali buıyrdy. Áıgerim Sáttibaeva (48 kg) shırek fınalda álem chempıonatynyń eki dúrkin júldegeri ózbekstandyq Sabına Bobokýlovany 3:2 esebimen jeńdi. Jartylaı fınalda mońǵol qyzy Nomýndarı Enh-Angalanǵa ese jiberip, qola júldeni qanaǵat tutty. Tájirıbeli jerlesimiz 2024 jyly Taıland elinde ótken Azııa chempıonatynan da qola medalmen oralǵan edi.
Qyzdardyń ishinen tek úsh boksshymyz qurlyq alamanynyń altyn medali úshin baq synady. Jartylaı fınalda jastar arasynda álem chempıony, Qytaı eliniń boksshysy Alımır Abýdýreımýden basym túsken Baqyt Seıdish (70 kg) fınaldyq jekpe-jekte Úndistan boksshysy Arýndhatı Choýdharımen aıqasyp, 4:1 esebimen ese jiberdi. Eresekter arasyndaǵy Azııa chempıonatyna alǵash ret qatysqan jerlesimiz sóıtip, kúmis júldeger atandy.
Nadejda Rıabes (80 kg) jartylaı fınaldyq tartysta álem chempıonatynyń qola júldegeri úndistandyq Pýja Ranıdy yǵystyrdy. Sheshýshi aıqasta ózbek qyzy Rýhshona Parpıevadan basym túsip, Azııa chempıony atandy. Buǵan deıin 80 kg salmaqta 2021 jyly Farıza Sholtaı, 2024 jyly Gúlsaıa Erjan qurlyq úzdigi atanǵan bolatyn.
Asa aýyr salmaqta (+80 kg) Dına Islambekova úndistandyq Alfııa Pazandy súrindirip, Azııa chempıonatynyń altyn medalin oljalady. 1-raýndta nokdaýnǵa túsirip, qalǵan eki raýndta da basymdyqty ýystan shyǵarmady. Buǵan deıin asa aýyr salmaqtaǵy arýlarymyz Azııa chempıonatynan úsh altyn medal alǵan edi. 2010 jyly Marına Volnova, 2021 jyly Lázzat Kúngeıbaeva, 2024 jyly Eldana Tálipova el mereıin ústem etti. Sańlaqtar sapyna Dına da qosyldy.
Qyzdarymyz qurlyq dodasynan 2 qola, 1 kúmis, 2 altyn júlde ıelendi. Búgin rıngke erler shyǵady. Bes boksshymyz fınalda óner kórsetedi.
