Sýretti túsirgen – Erlan OMAR, «EQ»
Qýanysh Seıitjanov baıqaý Ádiletti Qazaqstan, Adal azamat sekildi qundylyqtardy dáripteý, qazaq halqynyń rýhanı murasy – bata berý dástúrin jańǵyrtý jáne jas urpaqtyń boıyna tárbıelik máni joǵary sóz ónerin sińirý maqsatynda uıymdastyrylǵanyn atap ótti. Ol aýyl men Astana arasyndaǵy rýhanı kópir, dástúr dánekeri bolyp aýyl-aýyldan kelgen batagóılerge alǵys aıtyp: «Bata – aǵaıynnyń arasyndaǵy aq tilek qana emes, eldik murattyń jarshysy. Sol sebepti 2024 jyly partııamyzdyń bastamasymen «Batamenen el kógerer» baıqaýyn bastadyq. Alǵashqy kezde qalaı bolady eken, batagóıler bar ma eken degen kúmán boldy. Qudaıǵa shúkir, «el ishi – óner kenishi» eken. Osy kúnge deıin, úsh jyldyń ishinde 900-den astam bata partııamyzdyń qoryna kelip tústi», deı kelip, bıyl da qazylar alqasynyń sheshimimen júzden júırik, myńnan tulpar shyqqan baıqaý jeńimpazdary anyqtalǵanyn atap ótti.
Erbolat Saýryqov baıqaýda arnaýly júldelerge ıe bolǵan Jetisý oblysy Qaratal aýdany Kálpe aýylynyń turǵyny Almahan Shákıevaǵa, Shyǵys Qazaqstan oblysy Samar aýdany Kókjota aýylynyń turǵyny Aıan Qalymbekke jáne Astana qalasynyń turǵyny Nurymjan Aldabergenovke demeýshiler atynan syı-sııapattar tabystady. Al baıqaýda birinshi oryn ıelengen Qonaev qalasynyń turǵyny Berik Baılov, ekinshi orynǵa ıe bolǵan Aqtóbe oblysy Baıǵanın aýdany Qaraýylkeldi aýylynyń turǵyny Jeksenbaı Alǵazın jáne úshinshi oryndy qanaǵat tutqan Jambyl oblysy Jýaly aýdany B.Momyshuly aýylynyń turǵyny Seıitqazy Medetbekti Májilis depýtaty Jıgýlı Daırabaev marapattap, qarjylaı sertıfıkattar usyndy.
«Ulttyq mýzeı tórinde ulttyq dástúrimizdi dáriptegen batagóıler baıqaýynyń qorytyndysy shyǵarylyp otyr. Baıqaý eki-úsh jyldan beri óziniń ómirsheńdigin tanytyp jatyr. Batagóıler baıqaýy ulttyq rýhanııatty jańǵyrtýǵa, halyqtyq dástúrlerdi keńinen nasıhattaýǵa, sondaı-aq batagóıler ónerin dáripteýge mol úles qosyp keledi. Sol sebepti bolashaqta baıqaýdy budan da baıytyp, júlde qoryn kóbeıtýdi josparlap otyrmyz», degen Jıgýlı Daırabaev is-sharaǵa atsalysqan barsha batagóıge rızashylyǵyn bildirdi. Saltanatty marapattaýdyń sońy jyrshy-termeshilerdiń «Atalar sózi – asyl muramyz» atty konserttik baǵdarlamasyna ulasty.
