Forýmdy CILT Central Asia – Logıstıka jáne kólik salasyndaǵy Koroldik ınstıtýttyń Ortalyq Azııadaǵy ókildigi uıymdastyrdy. Bul uıym álem boıynsha 35 myńnan astam mamandy biriktirip, salanyń damýyna halyqaralyq bilim berý, tájirıbe almasý jáne úzdik tájirıbelerdi engizý arqyly úles qosyp keledi.
Is-sharaǵa 100-den astam úzdik stýdent pen sala mamandary qatysyp, ózara tájirıbe almasyp, ózekti trendterdi talqylady. Forým aıasynda stýdentter arasyndaǵy baıqaýlar, startap jobalar tanystyrylymy jáne sarapshylarmen paneldik sessııalar uıymdastyryldy.
Forýmnyń ashylýynda sala kóshbasshylary sóz sóılep, logıstıkanyń mańyzy men jas mamandardy qoldaý máselesine toqtaldy. Olardyń qatarynda Kólik vıse-mınıstri Maqsat Qalıaqparov, Prezıdent Ákimshiliginiń avıasııa baǵytynyń jetekshisi Araı Beıseınbaıqyzy, CILT Central Asia prezıdenti Nurlan Igembaev jáne Coventry University akademııalyq dırektory Saımon Eterton bar.
Forýmnyń mańyzdy bóligi – paneldik sessııa boldy. Onda qatysýshylar sarapshylarmen tikeleı pikir almasyp, praktıkalyq keńester aldy. Sessııany «NurZhol Company» baqylaý keńesiniń tóraǵasy Qanat Qobesov júrgizdi. Spıkerler qatarynda MultiCode kompanııasynyń teń quryltaıshysy Anýar Sársembınov, Alstom jobalyq menedjeri Beıbit Ibraev jáne «Logsoft» kompanııasy dırektorynyń orynbasary Aset Toqatov boldy.
Negizgi bólimde qatysýshylar «Jasyl logıstıka jáne sıfrlandyrý» taqyrybynda jobalaryn usynyp, qazylar alqasynyń baǵasyna ıe boldy. Sarapshylar olardyń jumystaryna kásibı baǵa berip, usynystaryn aıtty.
Eki kezeń qorytyndysy boıynsha:
I oryndy – Maqsut Narikbayev University;
II oryndy – Qazaq-Nemis ýnıversıteti;
III oryndy – Qyrǵyz memlekettik tehnıkalyq ýnıversıteti (Razzakov atyndaǵy) ıemdendi.
Next Generation Youth Forum – logıstıka salasynyń bolashaq mamandary úshin tájirıbe jınap, kásibı baılanys ornatýǵa múmkindik beretin mańyzdy alań. Bul forým jas mamandardyń jańa ıdeıalaryn qoldap, Qazaqstan men Ortalyq Azııadaǵy logıstıka salasynyń damýyna serpin beredi.
