Páter alǵandardyń qatarynda Qazaqstannyń qoldanbaly jáne irgeli áleýetin qalyptastyryp júrgen ártúrli ǵylym salalarynyń ókilderi bar.
31 jastaǵy Álisher Mútáli Iаdrolyq fızıka ınstıtýtynda jumys isteıtin fızık. Ol ıadrolyq energetıkaǵa arnalǵan materıaldardyń radıasııalyq tózimdiligin zertteýge mamandanǵan.
7 jyldan astam ǵylymı tájirıbesi bar, halyqaralyq jýrnaldarda 20-dan astam maqalasy jarııalanyp, 20 ǵylymı konferensııada baıandama jasaǵan. Ol halyqaralyq granttardyń ıegeri jáne beıindi ǵylymı forýmdardyń laýreaty. Onyń zertteýleri bolashaq energetıkasy úshin mańyzdy bolyp tabylatyn radıasııalyq áserlerdi modeldeýge baǵyttalǵan.
Aqmaral Beısembaeva gýmanıtarlyq ǵylym salasynyń ókili. 8 jyldyq ǵylymı qyzmetinde 60-tan astam jarııalanymnyń, sonyń ishinde halyqaralyq basylymdardaǵy eńbekterdiń avtory atandy. Ol Qazaqstan tarıhy boıynsha irgeli akademııalyq eńbekterdi daıyndaýǵa qatysady, arhıv derekterin jáne saıası qýǵyn-súrgin taqyrybyn zertteıdi.
Indıra Músilimova hımııa salasyndaǵy qoldanbaly baǵytty usynady. Onyń zertteýleri sýdy tazartý jáne kúrdeli qospalardy bólýde qoldanylatyn membranalyq tehnologııalardy damytýmen baılanysty.
Indıra ınnovasııalyq materıaldar jasaý jobalarynyń ǵylymı jetekshisi.
«Qýanyshymda shek joq. Jańa páter aldyq. Jas ǵalymdarymyzǵa osyndaı qoldaý kórsetilip jatqanyna óte rızamyz. Prezıdentimizge alǵys aıtamyz», dedi ol.
Medet Tóleýbaev medısına salasynda 16 jyldyq tájirıbesi bar ǵalym, ǵylym men praktıkany qatar alyp júr. Onyń zertteýleri klınıkalyq medısına máselelerine, sonyń ishinde dıabettik taban asqynýlaryna arnalǵan. Ol kásibı marapattardyń ıegeri jáne medısınalyq bilim berý júıesinde ǵylymı baǵytty damytyp keledi.
Rahııa Elnazarqyzy agrarlyq ǵylym salasynda ósimdik sharýashylyǵynyń zamanaýı tehnologııalaryn engizýmen aınalysady. Onyń qazirgi jobasy aýyl sharýashylyǵy daqyldarynyń ónimdiligin arttyrýǵa baǵyttalǵan, bul eldiń azyq-túlik qaýipsizdigimen tikeleı baılanysty.
«Ǵylym salasynda júrgenime 12 jyl boldy. Bul men úshin úlken mártebe. Eń aldymen Memleket basshysy Qasym-Jomart Kemelulyna alǵys aıtqym keledi», dedi Rahııa Elnazarqyzy.
Sondaı-aq, elordada jeke baspanaly bolǵan jas ǵalymdardyń biri Elmıra Bazylhanova. Ol Ǵylym qyzmetkerleri kúni qarsańynda mundaı úlken syılyqty kútpegenin aıtty.
«Elimiz Jańa Konstıtýsııany qabyldaǵan osynaý tarıhı kezeńde Prezıdenttiń qolynan jańa páter kiltin aldyq. Mundaı úlken syılyq alamyz dep oılamadyq. Aqordada kiltti alǵanda qatty qýandyq. Qazir jańa páterimizdi kórip, tolqyp turmyz. Sheksiz rızamyz», dedi ol.
Osylaısha, baspana alǵandardyń qatarynda el úshin mańyzdy salalar - energetıka, tarıh, ekologııa, medısına jáne aýyl sharýashylyǵynda eńbek etip júrgen ǵalymdar bar. Olardyń ǵylymı baǵyttary memlekettik saıasattyń basymdyqtaryn kórsetedi.
Eske sala keteıik, ótken jyly 271 jas ǵalym baspanaly boldy. 2025 jyly ǵylymı syılyqtar taǵaıyndalyp, halyqaralyq taǵylymdamalarǵa ondaǵan stıpendııa men granttar bólindi.
Sondaı-aq, ǵylymı dárejeler úshin qosymsha aqylar engizilip, zertteýlerge ınvestısııa salatyn bıznes úshin salyqtyq yntalandyrý sharalary qabyldandy.
