Sýret: kaz.inform.kz
Nysandardy aralaý barysynda qala ákimi Darhan Satybaldy men jaýapty uıymdardyń ókilderi qatysty. Alataý aýdanynda ornalasqan JEO-2 stansasyn tabıǵı gazǵa kóshirý jobasy iske asyrylyp jatyr. Qurylys jumysy 2024 jyly bastalǵan, aıaqtalýy bıylǵa josparlanǵan. Merdiger mindetin Qytaı kompanııalarynyń konsorsıýmy atqarady. Joba nátıjesinde saǵatyna 952 gıgakalorııa jylý, 600 megavatt elektr óndiretin zamanaýı gaz stansasy iske qosylýǵa tıis. Bul qaladaǵy energııa tapshylyǵynyń aldyn alýǵa ári atmosferaǵa taralatyn zııandy zattar kólemin qysqartýǵa múmkindik beredi.
Qazir negizgi ári qosalqy jabdyqtardy jetkizý isi tolyq aıaqtalýǵa jaqyn. Úsh gaz týrbınasy men generatorlar, tórt sý jylytý qazandyǵy ornatylǵan. Kádege jaratý qazandyǵyn montajdaý jalǵasady. Qosalqy ınfraqurylym men jol jelisi daıyn. Negizgi qurylys nysandaryndaǵy jumys shamamen 55 paıyz deńgeıinde oryndalǵan. Bas korpýs, sý daıyndaý júıesi, gaz daıyndaý pýnkti, elektr tehnıkalyq ınfraqurylym baǵytynda qurylys-montaj jumysy júrgizilip otyr.
JEO-2 Almatydaǵy eń iri jylý kózderiniń biri sanalady. Stansany jańǵyrtý megapolıstiń energetıkalyq turaqtylyǵyn arttyrýmen qatar, ekologııalyq qaýipsizdikti kúsheıtýge yqpal etedi.
Roman Sklıar jobany belgilengen merzimde aıaqtaýdy, qurylys sapasyn turaqty baqylaýda ustaýdy ári jabdyqtardy jetkizý kestesin qatań saqtaýdy tapsyrdy. Nysandy josparlanǵan ýaqytta iske qosýǵa barlyq uıymdastyrý sharalaryn jedeldetý qajet ekeni aıtyldy.
Jumys sapary barysynda Ile aýdanyndaǵy JEO-3 stansasyn jańartý jobasy da qaraldy. Atalǵan nysan 2007 jyldan beri «Almaty elektr stansalary» aksıonerlik qoǵamy quramynda jumys istep keledi. Joba aıasynda qýaty keminde 450 megavatt bolatyn bý-gaz qondyrǵysyn salý men tozyǵy jetken jabdyqtardy jańartý kózdelgen. Qurylysqa jergilikti kompanııalar konsorsıýmy tartylǵan.
Qazir ınjenerlik izdestirý men jer daıyndaý kezeńi tolyq aıaqtalǵan. Irgetas quıý, negizgi ınfraqurylymdy qalyptastyrý jumysy júrgizilip jatyr. Gaz týrbınalyq qondyrǵynyń alǵashqy jıyntyǵy ornatylyp, jabdyqtardy montajdaý jalǵasyp keledi.
Birinshi vıse-premer qurylys qarqynyn kúsheıtýdi, jobaǵa qatysýshy uıymdardyń úılesimdi áreketin qamtamasyz etýdi tapsyrdy. Nysandy jańǵyrtý energetıkalyq qýatty arttyryp, óńirdiń ındýstrııalyq damýyna qosymsha múmkindik beredi.
