Sýretti túsirgen – Jumabaı MUSABEK
Byltyr óńirde 412,8 myń sharshy metr turǵyn úı paıdalanýǵa berilgen. Bul 2024 jylmen salystyrǵanda 11%-ǵa artyq. Bıyl aýdanda 60 páterden turatyn eki kópqabatty turǵyn úı qoldanysqa berildi.
Jańa úıler Sarqan aýdanyna qarasty Sarqan qalasynyń jańadan boı kóterip kele jatqan shaǵyn aýdanynda ornalasqan. Bes qabatty turǵyn úıler zamanaýı talaptarǵa saı salynyp, turǵyndardyń jaıly ómir súrýine qajetti barlyq jaǵdaı qarastyrylǵan. Úılerde bir, eki bólmeli 30 páter, sondaı-aq úsh bólmeli, keń ári jaryq 60 páter bar. Baspanalar halyqtyń áleýmettik osal toptary sanatyna jatatyn azamattarǵa berildi. Saltanatty is-shara barysynda jańa páter ıeleriniń qýanyshy men rızashylyǵy erekshe sezildi.
Jalpy, Sarqan aýdanynda turǵyn úı qurylysy munymen toqtap qalmaıdy. Atalǵan eki kópqabatty úıden bólek, aýdannyń aýyldyq eldi mekenderinde 62 jeke turǵyn úı paıdalanýǵa berýge tolyq daıyn. Bul bastamalar óńirde halyqtyń ómir súrý sapasyn arttyrýǵa, áleýmettik turaqtylyqty qamtamasyz etýge baǵyttalǵan jumystyń júıeli túrde júrgizilip jatqanyn kórsetedi.
Oblys ákimi baspasóz qyzmetiniń málimetinshe, ótken jyly kezekte turǵan 2166 azamatqa berilýge tıis turǵyn úılerdiń qurylysy tyńǵylyqty júrgizildi. Sonyń 1002-si búginde jańa qonysqa kirip te úlgerdi. Turǵyn úıdi bólý rásimi «Otbasy bank» arqyly júzege asty.
Sondaı-aq Kerbulaq aýdanynyń Saryózek aýylynda «Samuryq-Qazyna» ınvestısııalyq holdınginiń qarajaty esebinen salynǵan 5 qabatty 60 páterli turǵyn úı paıdalanýǵa berildi. Qonys ıeleri qatarynda kópbalaly, tolyq emes otbasylar, múgedek balalary bar nemese olardy tárbıelep otyrǵan januıalar, jetim balalar men ata-anasynyń qamqorlyǵynsyz qalǵan jastar, sondaı-aq múmkindigi shekteýli azamattar bar. Bul – memleket tarapynan kórsetilip otyrǵan naqty áleýmettik qoldaýdyń aıqyn kórinisi.
Osylaısha, Jetisý oblysynda turǵyndardy baspanamen qamtý baǵytyndaǵy júıeli jumys naqty nátıjesin berip keledi. Áleýmettik osal sanattaǵy azamattarǵa qoljetimdi ári jaıly turǵyn úı usyný – óńirdiń áleýmettik saıasatynyń basty basymdyqtarynyń biri.
Jetisý oblysy
