Kekilbaev tulǵasyna arnalǵan kitap

Memlekettik qyzmet isteri agenttiginiń tóraǵasy Darhan Jazyqbaı aldymen memlekettik qyzmetshilerdiń kásibı jáne tulǵalyq bolmysyn qalyptastyrý boıynsha atqarylyp jatqan jumysqa toqtaldy. Ol sózinde memlekettiń tuǵyrly bolýyna, júıeli jumys isteýine memleket qaıratkerleriniń mol úles qosqanyn tilge tıek etti. «Tulǵataný baǵytyna basymdyq berip, jas memlekettik qyzmetshilerge memleket qaıratkerleriniń eńbek jolyn nasıhattaýdy qolǵa aldyq. Byltyr Berdibek Saparbaev týraly kitap shyǵarǵan edik. Endi, mine, abyz aǵamyz Ábish Kekilbaıulynyń tulǵalyq bolmysyn tanytýǵa arnalǵan kitap basylyp shyqty. Ol kisiniń qazaq rýhanııatyna, ádebıetke sińirgen eńbegin kópshilik biledi. Alaıda memlekettik qyzmettegi qaıratkerligin kóp adam bile bermeýi múmkin. Sol sebepti bul kitap bolashaqta memlekettik qyzmetshilerge úlken úlgi, ónege bolatyny sózsiz», deı kelip, Ábish Kekil­baıulynyń memlekettik qyzmettegi eńbekterin atap kórsetti.

Memleket qaıratkeri Qýanysh Sultanov Ábish Kekilbaevtyń tulǵalyq qyryn tanytýǵa arnalǵan kitaptyń jaryqqa shyqqanyna rızashylyq bildirdi. «Ábish – búkil qazaqqa tán tulǵa. Ol memlekettik qyzmette júrgende bılikti izgilendirip, aqyl-sananyń jolyn ashyp, ıntellekt kirgizýge tyrys­ty. Sol arqyly bılik pen saıasatty úılestire bildi. Ábish Kekilbaev 70 jasqa tolǵanda «Egemen Qazaqstan» gazetine «Kekilbaev keńistigi» degen maqala jazǵan edim. Sol maqalamda onyń memlekettik qyzmetti qalaı jandandyryp, kóriktendirgeni týraly jan-jaqty baıandadym. Ábish – memlekettik qyzmetke kórik bergen azamat. Sol sebepti onyń saıasatta salǵan izin búgingi bizdiń memlekettik qyzmetshilerimiz jalǵastyryp, odan úlgi alýǵa tıis», dedi ol.

Al memleket qaıratkeri Qyrymbek Kósherbaev tarıhty jalpy emes, jalqy jasaıtynyn alǵa tartyp, eldiń kelbetin, tabıǵatyn jerasty baılyǵy emes, qabyrǵaly azamattary qalyp­tastyratynyn atap ótti. Ol Memlekettik basqarý akade­mııa­synyń tulǵalar mektebin qalyp­tastyrý baǵytynda jasap jatqan jumysyn joǵary baǵalady. «Temirbek Júrgenov, Ilııas Omarov, О́zbekáli Jánibekov sekildi Ábish aǵa da memlekettik qyzmet pen rýhanııat máselelerin durys ushtastyra bildi. Ol kisiniń jazýshylyǵy da, memlekettik qyzmeti de bir tóbe. Alaıda ózim ony eń aldymen oıshyl dep qabyldaımyn. Kezinde Shyńǵys Aıtmatov Ábish aǵaǵa «sarqylmaıtyn adam» dep baǵa bergen edi. Shynynda ol naǵyz aqyldyń keni bolatyn. Ábish aǵa bir maqalasynda Beket atany «sasqanǵa saıa, asqanǵa tosqan, ulysqa uran, urpaqqa ustaz, eldiń ıesi, jerdiń kıesi» dep baǵalaǵan eken», deı kelip, Ábish Kekilbaevty qa­lamǵa qanyq, ǵalamǵa tanyq, kem­ge tilek, elge tirek, ultqa júrek bolǵan tulǵa ekenin alǵa tartty.

Memleket qaıratkeri Saýytbek Abdrahmanov keıingi jyldarda memlekettik qyzmetshiniń bedelin túsirý, memlekettik qyzmetten qashý sekildi úrdisterdiń boı alyp bara jatqanyna qynjylys bildirdi. Osyndaı sátte Ábish Kekilbaevtaı san qyrly tulǵanyń memleket qaıratkeri retindegi qyryna basa nazar aýdarýdyń óte mańyzdy ekenin jetkizdi. «Ábish – uǵymǵa aınalǵan adam. Ábishtiń memlekettiń qyzmetke kelýi jáne osy qyzmetke kóptegen jylyn arnaýy jóninde árkim ártúrli pikir aıtady. «Memlekettik qyzmetke kelmegende, talaı roman jazar ma edi», degen pikirler de bar. Alaıda memleket jańadan qurylyp, kóp dúnıeniń basy ashylmaı turǵan kezde qazaqqa romanıst, pýblısıst Kekilbaev kóbirek kerek pe edi? Álde Memlekettik hatshy, depýtat Kekilbaev kóbirek kerek pe edi? Meniń oıymsha, ekinshi Kekilbaev kóbirek kerek edi. Sondyqtan Ábish durys tańdaý jasady dep oılaımyn. Sebebi onyń janynyń jomarttyǵy bılikti izgilendirdi», deı kelip, memleket basqarýshy tulǵanyń Ábish Kekilbaevqa tańdaýynyń túsýi bıliktiń bedelin kótergenin jetkizdi.

«Ábishteı qazaqy, halyqshyl adamnyń jańa bılikten ornyn tabýy bılikke degen senimdi arttyrdy. Onyń memlekettik qaıratker retindegi danalyǵy, ustamdylyǵy úlken ról atqardy. Memlekettik hatshy bolyp turǵanda onyń bas­tamasymen Aýyl jyly, Ulttyq tarıh jyly jarııalanyp, qyrýar jumys jasaldy. Sondyq­tan tusaýy kesilip otyrǵan Kekil­baev jaıly kitap dittegen údeden shyǵa­dy dep senemin», dedi Saýyt­bek Abdrahmanov. Sondaı-aq ol jańa kitap Ábishteı tulǵanyń mem­lekettik qaıratker retindegi mártebesin kóterip qana qoımaı, memlekettik qyzmetshilerdiń de mártebesin bıiktetedi degen senim bildirdi.

Tusaýkeser rásimine qatysqan Parlament depýtattary Bıbigúl Jeksenbaı, Edil Jańbyrshın de elge qyzmet etýdiń bıik ólshemin kórsetken Kekilbaevtyń tulǵalyq kelbetine qatysty jyly pikirin ar­na­dy. Sondaı-aq Bıbigúl Jek­sen­­baı Senat tóraǵasy Máýlen Áshimbaevtyń arnaıy hatyn oqyp berdi.

«Kekilbaev tulǵasy» kita­byn Ulan Aıhoja men Abaı Seıfýl­lauly qurastyrdy. Kitapta qaıratkerdiń Parlamenttegi qyzmeti, Memlekettik hatshy retindegi mıssııasy, eldik múdde men qoǵamdyq kelisimge qatysty kózqarasy qamtylǵan.