Aortalyq stenoz – egde jasta jıi kezdesetin ári ómirge qaýipti derttiń biri. Bul aýrý ýaqytynda emdelmese, júrek jetkiliksizdigine ákelip, naýqastyń ómirin qysqartady. 90 jastan asqan adamǵa dástúrli ashyq operasııa jasaý óte qaýipti. Osyny eskergen dárigerler naýqasqa eń qaýipsiz ári tıimdi ádisti – az ınvazıvti TAVI tehnologııasyn tańdady.
Bul ádis kezinde jańa qaqpaqsha san arterııasy arqyly engizilgen juqa kateterdiń kómegimen júrekke jetkiziledi. Iаǵnı keýde súıegi kesilmeıdi, jasandy qan aınalymy apparaty qoldanylmaıdy. Mundaı tásil, ásirese, jasy úlken naýqasqa asa mańyzdy.
Dárigerler TAVI ádisiniń negizgi artyqshylyǵyn atap ótti. Birinshiden, ol aǵzaǵa túsetin júktemeniń az bolýyna, tez qalpyna kelýine, aýrýhanada jatý merziminiń qysqarýyna, sondaı-aq operasııalyq táýekeli joǵary naýqastyń dertinen aıyǵýyna múmkindik beredi. Angıohırýrg Arman Sadyqov: «Naýqastyń jasy – úlken qaýip faktory. Soǵan qaramastan, qazirgi medısınanyń múmkindikteri osyndaı kúrdeli jaǵdaıda da tıimdi kómek kórsetýge jol ashyp otyr. TAVI – aýyr operasııasyz ómir súrýge berilgen múmkindik», deıdi.
Basqarýshy kompanııanyń bas dırektory Jumaǵalı Ismaılov pasıenttiń jasyna qaramaı, barlyǵyna sapaly ári qaýipsiz medısınalyq kómek qoljetimdi ekenin tilge tıek ete kelip, 2023 jyly 97 jastaǵy qarııaǵa, odan keıin 103 jastaǵy keıýanaǵa sátti operasııa jasalǵanyn aıryqsha atap ótti.
«Júzge taıaǵan anamyzǵa osyndaı operasııa jasaý múmkindigi baryn bilmegen edik. Dárigerlerge kásibıligi men janashyrlyǵyna, asyl anamyzdyń ómirin uzartqanyna shyn júrekten alǵys aıtamyz», degen keıýananyń týystary da dárigerlerge rızashylyǵyn bildirdi.
Búginde TAVI – júrek qaqpaqshasy aýrýlaryn emdeýdegi eń zamanaýı ári tıimdi ádisterdiń biri. Egde jastaǵy naýqastardyń ómir sapasyn jaqsartýǵa járdemdesetin medısınadaǵy tyń tásil.
Almaty oblysy
