Súnııat Myrzekenuly – Semeı qalasynyń týmasy. Almaty memlekettik medısına ınstıtýtyn jalpy medısına mamandyǵy boıynsha támamdaǵan. Doktorlyq dıssertasııasyn sátti qorǵap, ǵylymda da jetistikke qol jetkizdi. Ýrologııa ǵylymı ortalyǵynyń rekonstrýktıvti-plastıkalyq ýrologııa bólimshesin 35 jyldan beri abyroımen basqaryp keledi. Barar jer, basar taýy qalmaı, jalǵyz úmitin arqalap kelgen talaı naýqasty aıaqqa turǵyzdy, saýyǵýyna sebepshi boldy. Ortalyq elimizdegi jetekshi uıymdardyń biri sanalady. Jyl saıyn 4 myńnan astam naýqasqa joǵary tehnologııalyq-medısınalyq kómek kórsetedi. Pasıentterdiń shamamen jartysyna jýyǵy Almaty qalasynyń turǵyny bolsa, ózge oblystardan keletinderdiń úlesi de sol shamada.
Súnııat Myrzekenuly osy ortalyqta júrip, 10 myńnan asa operasııa jasady. Ortalyqtyń myqtap qalyptasýyna, damyp, órkendeýine úles qosty. Otandyq ýrologııada laparoskopııa, endobeınehırýrgııa syndy jańa tásildi engizýge bastamashy boldy. Esesine, operasııanyń osy túri dástúrli, ashyq, jaraqatqa baılanysty operasııalardy, eń kúrdeli sanalatyn rekonstrýktıvti, plastıkalyq operasııalardy almastyrdy. Bul degenińiz – ýrologııada buryn kúrdeli sanalǵan birneshe operasııany endi tilik jasamaı emdeýge bolady degen sóz. Ol gıdronefroz, operasııadan keıingi strıktýralar, ıatrogendi, operasııa kezindegi zár shyǵarý joldarynyń jaraqattary syndy basqa da kúrdeli patologııalarǵa arnalǵan birneshe kúrdeli rekonstrýktıvti hırýrgııalyq ádisterdi ázirlep, klınıkalyq tájirıbege engizdi.
Professor S.Qusymjanov óziniń jyldar boıy jıǵan tájirıbesin jastarǵa úıretýdi kásibı mindeti ári aǵalyq izeti sanaıdy. Sodan bolar, bir operasııadan ekinshisine kirip, tutas bólimniń jumysyna jaýapty bolsa da, joǵary bilikti ýrologterdi daıarlaýǵa úles qosyp keledi. Ol – Eýropalyq ýrologter qaýymdastyǵynyń, Halyqaralyq ýrologter qoǵamynyń, Reseı ýrologııa ǵylymı qoǵamynyń múshesi. Esimi klınıkalyq pánder jónindegi medısına sarapshylarynyń halyqaralyq tizilimine engen. S.Qusymjanov ázirlegen hırýrgııalyq aralasýlar men laparoskopııalyq emsharalar elimizdiń 27 patentimen, 4 halyqaralyq patentpen rastalǵan.
Mamandyǵyna adal dárigerdiń medısınadaǵy osyndaı bastamalaryna, qajyrly eńbegine saı alǵan ataq, marapaty da jetedi. Degenmen, S.Qusymjanovtyń ózi eń úlken marapat halyqtyń batasy, alǵysy, yqylasy ekenin únemi aıtyp otyrady. Elge syıly dáriger otandyq medısınanyń kókjıegin keńeıtýden áli kúnge qol úzgen joq. Osynyń barlyǵyn saralap, qoryta kelip, Súnııat Qusymjanovty «Qazaqstannyń eńbek sińirgen qaıratkeri» qurmetti ataǵyna ábden laıyq dep sanaımyz.
Muratbek MUHAMBEKOV,
ekonomıka ǵylymdarynyń doktory, professor
