«Gıppokrat» toby 2024 jyly oblys kóleminde «Eń úzdik volonterlik top» atalymyn aldy. Osy oqý ornyndaǵy eriktilerdiń jumysy pandemııa bastalǵan jyly jandandy. 2020 jyly naýryzdyń sońynda shetelden ushyp kelgender arasynda alǵashqy naýqastar tirkelip, dert kúrt taralyp jatqanda alǵashqy synaq dárigerler men orta býyn medısına qyzmetkerlerine túsken-di. Mamandar jetispeı jatqanda, dárigerlik bilimnen habardar eriktiler aýrýhanadaǵy naýqastarǵa ottegi ballondaryn, qajetti zattar men quraldar jetkizdi, dárigerlerge syrttan tamaq tasydy, naýqastardy bólimshelerge tasymaldaýǵa kómektesti. 2020 jyldyń sáýirinde «Gıppokrat» tobynyń jetekshileri B.Dabyldına, V.Tileýlesova medısına mamandyǵyna oqyp jatqan stýdentterdi eriktiler qataryna qosylýǵa shaqyrdy. Osy kúnderi balalar pandemııa ýaqytynda jandaryn shúberekke túıip júrgen dárigerler jumysynyń qıyndyǵyn kórdi. Pandemııa elimizde volonterlik jumystyń jandanýyna jol ashty. Bir jaǵynan bolashaq mamandyǵyn meńgerýge sebi tıse, ekinshi jaǵynan qaıyrym kútken jandardyń rızashylyǵyn alý balalardyń kóńiline qanat bitirdi. О́ıtkeni júrektegi meıirim qaıyrymdy isterge jol ashady.
Eriktiler sapynda júrgen stýdentter oqýlaryn bitirip, jan-jaqqa ketse de, búginde oqý ornymen baılanysyn úzgen emes. Gıppokrattyqtardyń pandemııa kezindegi jumysy erekshe daralanyp, «Birgemiz» ulttyq jobasynyń «Saulyq» atalymy boıynsha respýblıkada úzdik toptardyń qataryna enip, óńir basshysy Ońdasyn Orazalınniń qolynan tósbelgi aldy. Osy kezden «Gıppokrat» eriktileri №1 «Áleýmettik qyzmet kórsetý ortalyǵy», «Aıala» ońaltý ortalyǵy, jedel járdem aýrýhanasy, «Úmit» sábıler úıi, JITS aldyn alý jáne oǵan qarsy kúres jónindegi oblystyq ortalyqta qamqorlyqqa zárý jandarǵa kómektese bastady. Odan ózge qaladaǵy jalǵyzilikti qarııalarǵa azyq-túlik, dári-dármek jetkizip, úılerin jınastyrýǵa qolǵabys etti. Bolashaq feldsherler men orta medbıkeler, tis tehnıkteri ustazdarymen birge qarttar úıindegi qamkóńil jandarǵa kútim jasady, qan qysymdaryn ólshep, tipti keıbirine tis protezderin salyp berdi. Qarııalardyń alǵysyn alǵan jastar qıyn kezde qoldaý kórsetýdiń mańyzyn túsindi. Qoldary bos kezde oqytýshylarymen birge mekemede turatyn qarttardy sán salonyna, T.Ahtanov atyndaǵy oblystyq drama teatryna qoıylymdarǵa aparyp, máz qyldy. Tórt qabyrǵada qamalyp otyrǵan qarııalarǵa óz bala-nemereleri emes, bógde balalar meıirim tókti. Osy toptyń músheleri «Medısına jastary» respýblıkalyq qoǵamdyq birlestigi grantyn jeńip alyp, júrip-turýy qıyn, pallıatıvti kómekke muqtaj, tósekke tańylǵan naýqastarǵa kómektesti. «Gıppokrat» tobynyń jetekshisi Erkenaz Bısenalyqyzynyń aıtýynsha, toptyń negizgi baǵyty – medısınalyq áleýmettik kómek kórsetý. Bolashaq mamandar jedel járdem aýrýhanasynda, emhanalardaǵy medbıkelik kútim bólimderinde jatyp qalǵan naýqastardyń denesinde oıylýdyń bolmaýyn qadaǵalap, kútim jasaıdy.
«Osy oqý ornyndaǵy volonterlik top burynnan beri jumys isteıdi. Ony uıymdastyrǵan oqytýshy – Balnur Dabyldınova. Men 2013 jyly qosyldym. 2019 jyly «О́zekti janǵa bir úmit» jobasymen grant konkýrsyna qatysyp, onyń qarjysyna pallıatıvti naýqastarǵa qajetti kútim zattaryn alyp, tarattyq. Kovıd kezinde qaraýymyzǵa alǵan birqatar jalǵyzilikti zeınetkerge azyq-túlik aparyp, kezekpen úılerin jınastyrdyq. 2023 jyly «Birgemiz» jobasymen grantqa qol jetkizip, ishek joldarynyń aýyr naýqasyna shaldyqqan jandarǵa qaladaǵy №3 emhana arqyly qajetti taýarlardy jetkizip berdik. Qarttar úılerine baryp, qarttar men múgedektigi bar jandarǵa jıi kómektesemiz. Beıimdeý ortalyǵyndaǵy eresekterdi medısınalyq tekseristen ótkizýge qolǵabys jasadyq. Muqtaj jandarǵa kórsetken kómegimiz elenip, 2023 jyly «Gıppokrat» klýby elimizdegi «Eń úzdik volonterlik top» júldesin ıelendi», deıdi eriktiler tobyn uıymdastyrýshylardyń biri, kolledj oqytýshysy Venera Tileýlesova.
Osy oqý ornyndaǵy taǵy bir volonterlik top «Dobromed» quramynda 85 erikti top jetekshisi N.Dementıevskaıanyń jetekshiligimen ınsýlt alǵan naýqastarǵa ońaltý jumysyn júrgizedi, múgedek balalardy qydyrtyp, sabaqtaryn oqytady. «Úmit» balalar úıine baryp, sábılerge anımasııalyq shoýlar kórsetip, oıyndar uıymdastyryp, áleýmettendirýge kómektesedi. «Dobromed» eriktileri medısınalyq jastar qozǵalysynan respýblıkalyq shaǵyn granttardy birneshe ret utyp aldy. Sonyń ishinde 2024 jyly top músheleri ázirlegen ınsýltke qarsy jobasy elimizdiń úzdik saýyqtyrý jobasy qataryna endi. Kómek pen qoldaýǵa muqtaj jandarǵa bar ynta-jigerlerimen kómektesip júrgen stýdentter kóp tájirıbe jınaqtady.
О́ńirdegi sany az medısınalyq baǵyttaǵy eriktilerdiń dástúr jalǵastyǵy úzilmeı keledi. Aldyńǵylarynyń isi – keıingilerge úlgi. Erikti jastardyń ómirlik baǵdary aıqyn, qaıyrymdylyq pen izgilik, meıirimdilik – olarǵa qur sóz ǵana emes, nátıjesi kórinetin naqty is. Volonterlik toptaǵy jastardyń basty qaǵıdalary – adamı qundylyqtardy saqtaý, muqtaj janǵa qaraılasý, qoǵamdy izgilendirýge úles qosý.
Aqtóbe oblysy
