Sýretterdi túsirgen – Iýrıı Bekker
Qandaı taqyrypty nysanaǵa alsa da janymen jazatyn pavlodarlyq sýretshi bul joly myńboıaýly megapolıstiń tynys-tirshiligin qylqalamǵa arqaý etken. «U2 nemese Ál-Farabı dańǵylyndaǵy serýen» dep atalǵan kórmede Almaty peızajdary alma-kezek aldyńnan shyǵady. Kenepte alma shahardyń kúndelikti beımaza tirshiligi bylaı qalyp, janyńdy shýaqqa bóleıtin ásem kórinister kóz aldyńnan tizbektelip ótedi.
Kartınalardan Alataý baýyryndaǵy alyp qalanyń bir sáttik kúıin, ishki rýhyn sezingendeı bolasyz. Avtor Almatyny jan-tánimen túsinetin, júregimen qabyldaıtyn sýretker retinde beıneleıdi. Sondyqtan da bolar, kartınalardaǵy jaryq pen kóleńke, qozǵalys pen tynyshtyq úılesimi kórermendi beıjaı qaldyrmaıdy.
Frıdlınniń jumystarynda ýaqyttyń ózi baıaýlaı túskendeı. Bir qaraǵanda qarapaıym kóshe kórinisi – tereń oıǵa jeteleıdi, al kún sáýlesine malynǵan aǵashtar men ǵımarattar arasyndaǵy úılesim tirshiliktiń ásem yrǵaǵyn ańǵartady. Sýretshi megapolıstiń qarbalasynan góri, onyń adam janyna jyly tıetin jumsaq qyrlaryn kóbirek ashýǵa umtylǵan.
Kórmedegi árbir jumys – bir hıkaıa. Birinde jańbyrdan keıingi dymqyl asfalttan shaǵylysqan sham jaryǵy kórinse, endi birinde keshki Almatynyń mamyrajaı tynysy seziledi. Qala kórinisteri arqyly sýretshi kórermendi óz estelikterine jeteleıdi, kenep betinen árkim óz Almatysyn izdeıdi.
«Osydan shırek ǵasyr buryn pavlodarlyq sýretshilerdiń qoltańbasymen tanysýdyń sáti tústi. Olardyń ishinde sol kezdegi jas sýretshi Evgenıı Frıdlınniń máneri erekshe nazar aýdartty. Onyń keskindemesi tánti etkeni sonsha, Almatyda kórmesin uıymdastyrdyq. Bul 2006 jyl bolatyn. Sodan beri jıyrma jyl artta qalsa da Frıdlınniń shyǵarmashylyǵy óz bıiginde. Keıin osy shyǵarmashylyq baılanys dostyqqa ulasty. Bul jolǵy kórme ekspozısııasyna Almaty qalasy men Ál-Farabı dańǵylyna arnalǵan 40-tan astam týyndy qoıyldy. Sýretshiniń shalqar shabytyn qozǵalys, ýaqyt jáne qalanyń mádenı ózgerisiniń rámizi retinde qarastyrýymyzǵa bolady. Kórmede avtordyń biregeı qoltańbasyn usyna otyryp, qalamyzdyń damýyn, munda paıda bolǵan jańa týrıstik nysandardy da kórermenmen tanystyrǵymyz keldi», deıdi «Ular» galereıasynyń dırektory Iýrıı Markovıch.
ALMATY
