Foto: Almaty qalasy ákimdigi
Qalalyq kommýnaldyq ınfraqurylym jáne turǵyn úı ınspeksııasy basqarmasynyń málimetinshe, «Almaty Tazalyq» MKK jáne merdiger uıymdar táýlik boıy kezekshilikke kóshti. Jumystarǵa 104 arnaıy tehnıka, 74 motopompa jáne 12 assenızatorlyq kólik tartylǵan. Onyń ishinde 9 tehnıka sý basý qaýpi joǵary aýmaqtarǵa ornalastyryldy.
Qalada 75 jedel brıgada jasaqtalyp, olardyń quramynda 425 jol salasy jumysshysy bar. Sonymen qatar 2300 qum toltyrylǵan qap daıyndaldy. Jalpy táýliktik kezekshilikke 2710 qyzmetker jumyldyrylyp otyr.
Almaty qalasynyń Qutqarý qyzmeti de kúsheıtilgen rejımde jumys istep jatyr. Olar 15 motopompa men 1 assenızatorlyq kólikti kezekshilikke shyǵarǵan. Al Tótenshe jaǵdaılar departamenti 53 tehnıka men 240 qyzmetkerdi jumyldyrdy.
Boljamdar naqtylana túspek: «Qazgıdromet» sýperkompıýterdi paıdalana bastady
«Qazgıdromet» boljamyna sáıkes, 16 sáýirde kún ala bultty bolyp, saǵat 16:00-den 17 sáýir 02:00-ge deıin keı jerlerde 17 mm-ge deıin nóser jańbyr jaýdy. Naızaǵaı oınap, jeldiń ekpini 15-18 m/s-qa deıin jetedi. Kúndiz aýa temperatýrasy +17…+19°S shamasynda bolǵan.
17 sáýir kúni saǵat 11:00-den bastap kún boıy 12 mm-ge deıin jańbyr kútiledi. Naızaǵaı oınap, jeldiń ekpini 18 m/s-qa deıin kúsheıýi múmkin. Túnde aýa temperatýrasy +8…+10°S, kúndiz +11…+13°S bolady.
Qalalyq qyzmetter jaǵdaıdy turaqty baqylaýda ustap, qajet bolǵan jaǵdaıda turǵyndar men qala qonaqtarynyń qaýipsizdigin qamtamasyz etý úshin jedel sharalar qabyldaıdy.
