Foto: Depositphotos.com
Megapolıstiń Tótenshe jaǵdaılar departamentiniń málimetinshe, oqıǵa Bostandyq aýdanyndaǵy «Remızovka» baý-baqsha seriktestiginde bolǵan. Qutqarýshylarǵa shaqyrtý 16 sáýir kúni keshki ýaqytta túsken.
Oqıǵa ornyna barǵan mamandar mol jaýyn-shashyn saldarynan topyraqtyń shamadan tys ylǵaldanyp, sonyń nátıjesinde kólemi 300 m² bolatyn topyraq massasynyń ishinara jyljyǵanyn anyqtaǵan. Saldarynan úıdiń shatyry zaqymdanǵan.
Tótenshe jaǵdaı ornyna 40 qyzmetker jumyldyryldy. Qutqarýshylardyń aıtýynsha, zardap shekkender tirkelmegen.
Qalada jańbyr ekinshi táýlik qatarynan jaýyp tur. Osyǵan baılanysty mamandar turǵyndarǵa qaýipsizdik sharalaryn qatań saqtaýdy eskertti. Ásirese taýǵa barýdy ýaqytsha keıinge qaldyrýǵa shaqyrady.
Kóshkinniń aldyn alý úshin qutqarýshylar mynadaı usynystar aıtty:
– germetıkalyq emes septıkterdi, shuńqyrlardy jáne dárethanalardy paıdalanbaý;
– jeke úı ıeleri men baý-baqsha seriktestikteriniń basshylaryna sýarý qubyrlaryn, káriz jáne drenaj júıelerin turaqty baqylaýda ustaý;
– ýchaskelerde sýdyń jınalýyna jol bermeı, jańbyr jáne erigen qar sýlaryn ýaqtyly burýdy qamtamasyz etý.
Mamandardyń aıtýynsha, jaýyn-shashyn kezinde topyraqtyń shamadan tys ylǵaldanýy kóshkin qaýpin arttyrady, sondyqtan ár turǵyn saqtyq sharalaryn nazardan shyǵarmaýy tıis.
Boljamdar naqtylana túspek: «Qazgıdromet» sýperkompıýterdi paıdalana bastady
