Tańǵy saǵat 9:00-den 17:00-ge deıin jalǵasqan dýmandy basqosý bilim ordasynyń aýlasyn ulttyq naqyshqa toly mádenı keńistikke aınaldyrdy. Ondaǵy maqsat – jas urpaqqa qazaq halqynyń salt-dástúrin, mádenıeti men rýhanı murasyn tanytý, ulttyq biregeılikti nyǵaıtý jáne Naýryz meıramynyń mazmunyn tereń uǵyndyrý.
Mektep dırektory Berikbol Maratulynyń aıtýynsha, bul kúni aýlada 42 kıiz úı boı kóterip, ár shańyraqta halqymyzdyń turmys-tirshiligi men dástúrleri keńinen dáripteldi. Kelýshilerge arnalǵan túrli tanymdyq ári oıyn-saýyq alańdary uıymdastyrylyp, kópshiliktiń qyzyǵýshylyǵyn arttyrdy.
Atap aıtqanda, «Kóktem syıy» áshekeı buıymdar kórmesi, «Altybaqan Zone» altybaqan alańy, «Naýryz dámi» ulttyq taǵamdar jármeńkesi, «Báıge» atqa miný aımaǵy men sadaq atý buryshy erekshe yqylasqa ıe boldy. Buǵan qosa, toǵyzqumalaq, arqan tartys, qozy kóterý, bestas, asyq atý, qol kúresi, kókpar sekildi ulttyq oıyndar ótkizilip, qatysýshylar belsendilik tanytty.
Sonymen qatar «Sheberlik sheberhanasy: dala órnegi» (aǵash oıý), «Taqııa – ult sáni», «Qysh-qumyralar qupııasy» baǵyttarynda qolóner sabaqtary uıymdastyryldy. «Bilim álemi» kitap kórmesi men «Tabıǵat sáni» tal egý aksııasy da jurt nazarynan tys qalmady. Al «BINOM BARYSY» qazaq kúresi saıysy men «Gúlder shýaǵy» fleshmoby merekeniń kórkin asha tústi.
