Foto: Saýda jáne ıntegrasııa mınıstrligi
Saýda jáne ıntegrasııa mınıstri Arman Shaqqalıev jumys saparymen Soltústik Makedonııanyń bas shaharyna baryp, birqatar mańyzdy kezdesýler ótkizdi. Sapar Memleket basshysynyń tapsyrmalaryn júzege asyrý aıasynda uıymdastyryldy.
Sapar barysynda Soltústik Makedonııa Prezıdenti Gordana Sılıanovska-Davkova mınıstrdi qabyldap, ekijaqty saýda-ekonomıkalyq yntymaqtastyqty keńeıtý máseleleri talqylandy. Prezıdent Astanaǵa jasaǵan saparyn atap ótip, Qasym-Jomart Toqaev pen Qazaqstan halqyna izgi tilegin jetkizdi. Sondaı-aq Antalııa dıplomatııalyq forýmy aıasyndaǵy kezdesýlerdiń mańyzyna toqtaldy.
Ulttyq bank AQSh Saýda palatasymen ınvestısııalyq yntymaqtastyqty keńeıtýdi talqylady
Kelissózder barysynda Soltústik Makedonııanyń Syrtqy ister jáne syrtqy saýda mınıstri Tımcho Mýsýnskımen ekijaqty saýdanyń qazirgi ahýaly men bolashaǵy jan-jaqty qaraldy. Taýar aınalymyn ulǵaıtý jáne turaqty ósimge jaǵdaı jasaý máselesine basymdyq berildi.
100-den astam makedonııalyq jáne otandyq kompanııalar qatysqan bıznes-forým qorytyndysynda Qazaqstannyń Syrtqy saýda palatasy men Soltústik Makedonııanyń Ekonomıkalyq palatasy arasynda Iskerlik keńes qurý týraly kelisimge qol qoıyldy. Sonymen qatar QazTrade men Soltústik Makedonııanyń ınvestısııalar tartý jáne eksportty ilgeriletý agenttigi arasynda birlesken jobalardy iske asyrýǵa arnalǵan memorandým bekitildi.
Forým nátıjesinde shamamen 500 mln teńge kóleminde kommersııalyq qujattarǵa qol qoıyldy.
Sapar aıasynda mınıstr «Bunardzik» ındýstrııalyq aımaǵynda bolyp, ekologııalyq taza óndiris pen joǵary tehnologııalarǵa negizdelgen kásiporyndardyń jumysymen tanysty.
Issapar jalǵasyp, Stambýl qalasynda túrik bıznes ókilderimen kezdesýler ótti. Olardyń qatarynda Orzax Group, Roz Metal jáne Safi Holding bar. Kelissózder barysynda atalǵan kompanııalar Qazaqstanda ınvestısııalyq jobalardy júzege asyrýǵa, óndiristi jergiliktendirýge jáne ónerkásiptik kooperasııany damytýǵa qyzyǵýshylyq tanytty.
Jalpy, bul sapar Qazaqstan men Soltústik Makedonııa arasyndaǵy ekonomıkalyq áriptestikti kúsheıtip, jańa ınvestısııalyq múmkindikterge jol ashty.
