Qaraly jıynǵa aqynnyń rýhyna taǵzym etý úshin zııaly qaýym ókilderi, áriptesteri men qalyń jurt jınaldy. Qoshtasý rásimin Qazaqstan Jazýshylar odaǵynyń tóraǵasy Mereke Qulkenov júrgizdi.
Memleket basshysy Qasym-Jomart Toqaevtyń kóńil aıtý hatyn Senat Tóraǵasy Máýlen Áshimbaev oqyp berip, aqynnyń ulttyq múdde jolyndaǵy eńbegi men Jeltoqsan oqıǵasynyń aqıqatyn ashýdaǵy batyldyǵy erekshe atap ótti.
Memleket basshysy Muhtar Shahanovtyń otbasyna kóńil aıtý jedelhatyn joldady
Sondaı-aq Májilis Tóraǵasynyń hatyn depýtat Janarbek Áshimjan jetkizse, Túrksoı uıymy atynan Ulyqbek Esdáýlet aqynnyń túrki álemindegi ornyna toqtaldy. Qoshtasý rásimine Qyrǵyz Respýblıkasynan arnaıy delegasııa qatysyp, Prezıdent Sadyr Japarovtyń kóńil aıtý hatyn tabystady.
Rásimnen keıin Muhtar Shahanovtyń denesi Túrkistan oblysyna jóneltildi. Aqyn tiri kezinde ózin týǵan jeri Otyrar óńirinde jerleýdi amanat etken bolatyn.
22 sáýir kúni Túrkistan oblysy Otyrar aýdanynda janaza namazy oqylyp, aqyn Qoǵam aýyldyq zıratyna jerlenedi. Onyń máńgilik mekeni Arystan bab kesenesine jaqyn ornalasqan.
