Foto: Aqorda
«Bizdiń tarıhymyz ben tamyrymyz – ortaq. Eki el de kóshpendiler órkenıeti men «kıiz úıler» mádenıetiniń murageri sanalady. Qos halyqtyń bolmysy men rýhanı dúnıesi, ómir salty men ádet-ǵurpy – úndes. Sondyqtan biz árdaıym bir-birimizge tilektes bolyp, jetistikterimizge shynaıy qýanamyz. Sońǵy jyldary Qazaqstan men Mońǵolııanyń qarym-qatynasy tyń qarqynmen damyp kele jatyr. Osydan bir jarym jyl buryn Mońǵolııaǵa memlekettik saparmen barǵanymdy bilesizder. Qadirli Prezıdent Ýhnaagıın Hýrelsýh myrzanyń jáne barsha mońǵol halqynyń yqylas-iltıpatyn árdaıym rızashylyqpen eske alamyn. Sol sapar barysynda Ctrategııalyq áriptestik týraly deklarasııaǵa qol qoıdyq. Bul – myńjyldyq baýyrlastyǵymyzdy birjola bekite túsken tarıhı qujat. Qazirgi tańda eki eldiń parlamentteri men quzyrly mınıstrlikteri tyǵyz baılanys ornatqan. Úkimetaralyq komıssııa jáne Iskerlik keńes tabysty jumys istep keledi. Prezıdent Hýrelsýhtyń búgingi sapary osy yntymaqtastyqty nyǵaıta túseri anyq», dedi Qazaqstan Prezıdenti.Taraptar ekijaqty qarym-qatynastyń barlyq baǵyty boıynsha mazmundy ári nátıjeli kelissózder júrgizgen.
«Saıası-ekonomıkalyq, mádenı-gýmanıtarlyq jáne ózge de saladaǵy yqpaldastyǵymyzdy odan ári arttyrýǵa kelistik. Atap aıtqanda, biz Mońǵolııanyń Baıan-О́lgeı aımaǵynda Qazaqstannyń konsýldyq mekemesin ashý týraly ózara kelisimge keldik. Muny, shyn máninde, baýyrlas ári tarıhy tamyrlas elderimizdiń arasyndaǵy strategııalyq seriktestik rýhyna saı keletin mańyzdy qadam dep aıtýǵa tolyq negiz bar. Sondaı-aq bul mońǵol eliniń qazaq halqyna degen izgi nıeti men shynaıy dostyq kóńiliniń aıqyn kórinisi ekeni sózsiz. Biz bul sheshimdi joǵary baǵalaımyz. Osy oraıda, men Prezıdent Hýrelsýh myrzaǵa zor alǵysymdy aıtqym keledi. Jalpy, sapar barysynda birqatar mańyzdy qujattarǵa qol qoıyldy. Búgin jasalǵan kelisimder eki eldiń alys-berisin jandandyra túsetini sózsiz. Qazaqstan men Mońǵolııa arasyndaǵy saýda-sattyq kólemi byltyr 130 mıllıon dollar bolyp, 7,7 paıyzǵa ósti. Elderimizdiń ekonomıkalyq áleýetin eskersek, bul kórsetkishti arttyrýǵa tolyq múmkindigimiz bar. Osy oraıda aldaǵy birneshe jylda taýar aınalymyn 500 mıllıon dollarǵa jetkizý jóninde meje qoıyp otyrmyz. Ol úshin, eń aldymen, saýda-sattyqtaǵy taýar túrin keńeıtýimiz kerek. Ekonomıkalyq yqpaldastyqty tejeıtin kedergilerdi barynsha azaıtý qajet. Osydan bir aı buryn Qazaqstannyń saýda mıssııasy Mońǵolııaǵa arnaıy saparmen bardy. Onda ekonomıkalyq baılanystardy ártaraptandyrýǵa qatysty mańyzdy usynystar jasaldy. Biz byltyr Eýrazııa ekonomıkalyq odaǵy men Mońǵolııa arasyndaǵy ýaqytsha saýda kelisimin ratıfıkasııaladyq. Bul qujat elderimiz úshin kóptegen tyń múmkindikke jol ashady», dedi Qasym-Jomart Toqaev.
