Basylym álemge áıgili National Geographic Society brendimen tyǵyz baılanysta sońǵy on jyl ishinde oqyrman qaýymǵa sapaly bilim berý baǵytynda eleýli úles qosyp keledi.
Búginde atalǵan jýrnal kóptegen oqyrman úshin álemdi tanýdyń senimdi kózine aınalyp otyr. Osylaısha basylym tabıǵatty qorǵaý, ekologııalyq sanany qalyptastyrý jáne bilimge umtylý sııaqty mańyzdy qundylyqtardy nasıhattaýdy jalǵastyryp júr.
«Sońǵy on jyl ishinde basylym qazaq tiliniń damýyna da óz úlesin qosty. Dýblıaj sapasynyń artýy jáne ǵylymı termınderdiń qazaq tilinde júıeli qoldanylýy − sonyń aıqyn dáleli. Osylaısha, National Geographic Qazaqstan tek aqparat taratýshy ǵana emes, bilim men mádenıetti damytýshy mańyzdy platformaǵa aınaldy», dedi jıynda National Geographic Qazaqstan jýrnalynyń shef-redaktory Aıbyn Shaǵalaq.
Shef-redaktordyń sózinshe, basylym búginde túrli jobalarmen seriktestik ornatqan. Bul jobalar jastardyń ǵylym men zertteýge degen qyzyǵýshylyǵyn oıatýda mańyzdy ról atqarady.
Jıynda Kaspıı ıtbalyǵyn qorǵaý baǵytynda eleýli qyzmeti men erekshelengen Ásel Tasmaǵambetova men ınklıýzıvti kommýnıkasııany damytýdaǵy eren eńbegi úshin Nurzada Amangeldige saltanatty túrde «National Geographic Qazaqstan elshisi» qurmetti ataǵy berildi.
«Kaspıı ıtbalyǵy tek Kaspıı teńizi aımaǵynda ǵana tirshilik etetin biregeı teńiz sútqorektisi bolyp sanalady. Onyń sanynyń azaıýy búkil teńiz ekojúıesiniń tabıǵı tepe-teńdigin buzýy múmkin. Sonymen qatar, ıtbalyqtardyń azaıýyna munaımen lastaný, balyq aýlaý quraldaryna túsip qalý jáne klımattyń ózgerýi sııaqty faktorlar áser etedi, sondyqtan bul túrdi saqtaý tabıǵatty qorǵaýdyń jáne bıologııalyq ártúrlilikti saqtaýdyń mańyzdy bóligi», dedi Ásel Tasmaǵambetova.
Sondaı-aq is-shara barysynda Nurzada Amangeldi óziniń ınklıýzııa baǵytyndaǵy biregeı jobasyn tanystyrdy.
«Álemde 120 ym-ıshara tili bar. Soǵan sáıkes uǵynysý tek qol arqyly ǵana emes, bet pen eringe tikeleı baılanysty. Al elimizde biryńǵaı ym-ıshara tili áli qalyptaspaǵan. Qazaq tili ortaq bolǵanymen, ym-ıshara túrinde ishki barerlerdiń áserinen onyń san alýan túri qalyptasqan. Sondyqtan biz osy baǵyttaǵy jumystarymyzdy jetildire túsýdi maqsat etemiz», dedi Nurzada Amangeldi.
