Is-sharanyń maqsaty – bitirýshi túlekterdi eńbek naryǵymen tikeleı baılanystyrý, jumys berýshiler men jas mamandar arasynda tıimdi áriptestik ornatý, sondaı-aq kásibı baǵdar berý jumystaryn júıeli túrde damytý boldy.
Jármeńkeniń ashylýynda ýnıversıtettiń Akademııalyq qyzmet jónindegi prorektory Baný Narbekova quttyqtaý sóz sóılep, sharanyń mańyzdylyǵyna erekshe toqtaldy.
Búgingi «Bos oryndar jármeńkesi – 2026» – ýnıversıtetimizdiń eńbek naryǵymen tyǵyz yqpaldastyǵyn aıqyndaıtyn mańyzdy strategııalyq alań. Qazirgi tańda ýnıversıtet 250-den astam jumys berýshi mekememen turaqty áriptestik ornatyp otyr. Sonyń nátıjesinde sońǵy oqý jylynda túlekterdi jumysqa ornalastyrý kórsetkishi 95 paıyzǵa jetti. Bul – sapaly bilim men tájirıbege negizdelgen daıarlyqtyń naqty jemisi, – dedi prorektor.
Sonymen qatar ol mundaı bastamalar stýdentterdiń kásibı qalyptasýyna tikeleı yqpal etetinin atap ótip:
Bizdiń maqsat – túlekterge tek dıplom berý emes, olardyń eńbek naryǵynda óz ornyn tabýyna naqty jaǵdaı jasaý. Búgingi jármeńke– sol júıeli jumystyń zańdy jalǵasy, – dedi.
Sonymen qatar, jármeńke aıasynda ýnıversıtet túlekterin jumyspen qamtýǵa baǵyttalǵan mansap-bosoryn.kz sıfrlyq platformasynyń múmkindikteri keńinen tanystyryldy. Atalǵan platformada jumys berýshiler usynǵan bos jumys oryndary jarııalanyp, bitirýshi túlekter sol arqyly tikeleı ótinim bere alady. Jiberilgen ótinimder birden jumys berýshiniń elektrondy poshtasyna jáne WhatsApp baılanys nómirine joldanyp, jumysqa ornalasý úderisin jedeldetip, ashyq ári tıimdi formatta uıymdastyrýǵa múmkindik beredi.
Is-shara barysynda jumys berýshiler óz uıymdarynyń qyzmet baǵyttaryn tanystyryp, usynylyp otyrǵan bos jumys oryndary týraly jan-jaqty aqparat berdi. Sonymen qatar, jas mamandar men mekeme ókilderi arasynda tikeleı baılanys ornap, ashyq formatta pikir almasý alańy qalyptasty. Bul óz kezeginde túlekterdiń kásibı baǵdaryn aıqyndap, eńbek naryǵyna senimdi qadam jasaýyna jol ashty.
Aıta ketý kerek, «Bos oryndar jármeńkesi – 2026» is-sharasy ýnıversıtettiń «Mansap» ortalyǵynyń uıymdastyrýymen júzege asyrylyp, bilim men óndiris arasyndaǵy baılanysty nyǵaıtýǵa, sondaı-aq jas mamandardyń jumyspen qamtylýyna baǵyttalǵan mańyzdy bastamalardyń biri retinde erekshelendi.
Is-shara sońynda jármeńkege qatysqan barlyq mekeme ókilderine Kásibı baǵdar jáne mansapty damytý departamentiniń dırektory Almas Naımanbaev ýnıversıtettiń Basqarma Tóraǵasy‑Rektory Bolat Tilep atynan Alǵys hattar tabystady. Sondaı-aq, seriktesterge ózara áriptestikti damytýǵa qosqan úlesteri úshin rızashylyq bildirdi.
