Foto: Aqorda
Memleket basshysy búgingi tańda armııany zaman talabyna saı nyǵaıtyp, elimizdiń qorǵanys qabiletin arttyrýǵa qajetti barlyq shara qabyldanyp jatqanyna nazar aýdardy.
«Qaýipsizdik máseleleri, elimizdiń qorǵanys qabiletin kúsheıtý, qyzmetterdiń bedelin kóterý – negizgi memlekettik basymdyqtar men mindetter. Sońǵy jyldary áskerı qyzmetshilerge, quqyq qorǵaý jáne arnaýly organdar qyzmetkerlerine keńinen qoldaý kórsetilip keledi. Atap aıtqanda, ıpotekalyq baǵdarlamalar iske qosyldy, eńbekaqy kólemi kezeń-kezeńimen artyp, áleýmettik jeńildikter kóbeıdi. Kúshtik qurylymdar sapyna jastardy kóptep tartyp, kadrlyq áleýetti nyǵaıtý isine kóńil bólinýde. Men áskerı oqý oryndarynyń úzdik túlekterin yntalandyrý jóninde tapsyrma berdim. Parlamentte úzdik bilim alýshylarǵa oqýdy támamdaǵan kezde birden «aǵa leıtenant» dárejesin berýge qatysty tıisti túzetýler qarastyrylyp jatyr. Jalpy, bıyl jáne kelesi jyldar áskerı bilim berý sapasyn arttyrýǵa arnalýy kerek», dedi Qasym-Jomart Toqaev.
Prezıdenttiń pikirinshe, elimizdiń aýmaqtyq tutastyǵyn qorǵaý, ulttyq qaýipsizdikti qamtamasyz etý, «Zań jáne tártip» ıdeologııasyn ornyqtyrý jaýapty ári jasampaz patrıotızmmen tyǵyz ushtasatyn asa mańyzdy mindet.
«Biz quqyqtyq nıgılızmge jol bermeıtin, ańyzdaǵy nemese qoldan jasalǵan «batyrlardy» emes, burynǵy jáne búgingi naǵyz qaharmandardy qurmet tutatyn úılesimdi qoǵam qurýymyz qajet. Týǵan eli men halqynyń ıgiligi jolynda adal qyzmet etken, ar men namysty bárinen bıik qoıǵan azamattar jastarǵa úlgi bolýǵa tıis. Olardyń qatarynda qaza tapqannan keıin erlikteri men batyrlyqtary elenip, orden-medalmen marapattalǵan áskerıler, polıseıler, qutqarýshylar, arnaýly organ qyzmetkerleri de az emes. Meniń bastamammen olardyń esimderi kósheler men túrli mekemelerge berilip jatyr. Mundaı tásildi vedomstvolyq nagradaǵa qatysty da paıdalanýǵa bolady. Osyndaı alǵashqy marapattyń biri – on bes jyl buryn janynan bezgen terrorshyny ustaý barysynda qaza tapqan polısııa kapıtany Ǵazız Baıtasov atyndaǵy medal. Bizdiń maqsatymyz – batyrlarymyzdyń erligin máńgi este qaldyrý, otandastarymyzdyń jarqyn beınesin júregimizde saqtaý, óskeleń urpaqty naǵyz erlikke, qaısarlyqqa jáne shynaıy patrıotızmge tárbıeleý», dedi Qasym-Jomart Toqaev.Eske sala keteıik, búgin Qasym-Jomart Toqaev memlekettik marapat jáne áskerı shen tapsyrý rásiminde sóz sóıledi. Jıynda Memleket basshysy Qazaqstan – Birikken Ulttar Uıymynyń bitimgerlik mıssııasyn derbes oryndaý mártebesine ıe bolǵan Táýelsiz Memleketter Dostastyǵy ishindegi jalǵyz memleket ekenin aıtty.
