№2 mektep-ınternattyń alpys bes jyldan astam tarıhy bar. Munda tirek-qımylynda buzylysy bar balalar bilim alady. Qazirgi kezde 171 bala mektepte, 208 oqýshy úıden oqytylady. Mektep dırektory, tájirıbeli ustaz Baqytgúl Ermekovanyń aıtýynsha, bilim ordasynda sapaly bilim berýmen qatar, tarıhı, rýhanı qundylyqtardy nasıhattap, balalardy taǵylymdy isterge baýlýda mazmundy mádenı sharalar jıi ótip turady.
Mereke kúnine oraılastyryp otyrǵan bul merekelik keshtiń orny bólek. El qorǵany bolǵan batyrlardy eske alyp, Otan qorǵaýda qyraǵy kúzette turǵan sarbazdar isin jas urpaq arasynda nasıhattaýdy maqsat etken saltanatty sharaǵa mektep-ınternattyń ardager-ustazdary shaqyrylyp, qurmet kórsetildi. Sonymen qatar bilim ordasynyń qamqorshylyq keńesiniń músheleri, demeýshiler men mektep túlekteri qatysty.
Mektepterde oqýshylarǵa smartfon qoldanýǵa tyıym salynýy múmkin
Merekelik keshte Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń bas ǵylymı qyzmetkeri, fılologııa ǵylymdarynyń kandıdaty, «Azamat áleýeti» QQ prezıdenti A. Seısenova, mektep-ınternat ardagerleri I.V. Ýtrobın, Q. Nurǵojaeva, qazaq fýtbolynyń ardageri, Almaty fýtbol federasııasynyń prezıdenti A.F. Mehtıev, DHL kompanııasynyń bas dırektory E.R. Bagdashkın, mektep túlegi, júzýden jáne ústel tennısinen halyqaralyq dárejedegi sport sheberi, paralımpıadalyq sportshy jáne jattyqtyrýshy A. Orazbek, «Qazaqstan halqyna» qorynyń stıpendııaty, Halyqaralyq ınjenerlik-tehnıkalyq ýnıversıtetiniń 2 kýrs stýdenti R. Stepanes, sonymen birge Q. Abdýllaevtyń «Aknıet» qory, «Simax Solution» kompanııasynyń ókilderi sóz sóılep, mektep tarıhy, tárbıelenýshilerdiń búgingi bilim belesindegi jetistigi týraly tolǵanystaryn jetkizdi.
Merekelik keshte mektep shejiresi týraly fılm kórsetilip, oqýshylardyń qolóner kórmesi ótti. Áserli kesh konserttik baǵdarlamamen jalǵasyp, halyqaralyq, respýblıkalyq, qalalyq baıqaýlardyń jeńimpazdary, 8-10-synyp oqýshylary A. Amırova, A. Orazbaı «Án sal,sarbazym» ánimen, mekteptiń «Jaýqazyn» amsambli, 5-synyp oqýshylarynyń úrmeli aspaptar orkestri qatysýshylardy óz ónerlerimen tánti etti. Sondaı-aq ánshi A. Táshimbetov, №12881 áskerı bólimniń sarbazdary – kapıtan A. Shyrynbek, kishi serjant Á. Yntyqbaev, efreıtor K. Qoıshybaeva qatysýshylarǵa merekelik kóńil-kúı syılady.
Saltanatty shara barysynda mektep dırektory Baqytgúl Ermekova tirek-qımylynda buzylysy bar balalarǵa psıhologııalyq, fızıkalyq qoldaý kórsetip, olardyń qoǵamda óz ornyn tabýynda tájirıbeli pedagogıkalyq ujymnyń eseli eńbegi jatqanyn atap ótti. Aıtýynsha, ustazdar qaýymy zamanaýı oqý quraldarynyń kómegimen balalardyń damýyna, tulǵalyq qalyptasýyna yqpal etip keledi. Búginde mektepte 150 pedagog jumys isteıdi. Osy rette respýblıkalyq «Aqbota» zııatkerlik olımpıadasy jeńimpazdaryn daıyndaǵan O.Aıdosova, R. Kazlahynova, S. Rahımbekova, S. Ishanova, A. Myltyqbaeva, F. Mamytbaı syndy ustazdar eńbegin atap ótken abzal. Abaı atyndaǵy QazUPÝ, Qyzdar pegagogıkalyq ulttyq ýnıversıtetin bitirip, osy mektepte tájirıbe jınaqtaǵan defektolog mamandar jumysyna da erekshe toqtalyp ótýge bolady.
«Mektebimizde pedagogıkalyq ujym oqýshylardyń úlgerim nátıjesine, jekelegen pánder boıynsha jetistikterine basty mán beredi. Al kásibı baǵdar berý maqsatynda qoldaý kórsetip, keńes bere otyryp, mamandyq tańdaýyna, óz salasy boıynsha tabysty jumys istep ketýine, ómirden óz ornyn tabýyna járdemdesýde júıeli jumystar atqarylyp jatyr. Japonııa, Malaızııa, Sıngapýr elderi tájirıbesimen tanysqanymda mektep-ınternatymyzdaǵy bilim berý baǵdarlamasynyń shetelden kem túspeıtinine kózim jetti. Dırektordyń oqý isi jónindegi orynbasary G. Darybaeva, V. Tıýrınanyń Horvatııa, Nıderland eline saparynyń nátıjeli bolǵanyn da atap ótkim keledi. Búginde ustazdarymyz «Perkins» halyqaralyq mektebinde 20-dan astam pedagog bilimin jetildirip, aldyńǵy qatarly pedagogıkalyq tehnologııalardy ıgerip, tájirıbesin jetildirý ústinde. Mektepte «Perkins» tájirıbesi negizinde resýrsty kabınet jumys isteıdi. Qamqorshylar keńesiniń tóraǵasy, mesenat, «Astana Motors» holdınginiń negizin qalaýshy N. Smaǵulovtyń qoldaýymen mektebimiz ámbebap trenajerlermen jabdyqtalǵan. Oqýshylarymyz pánaralyq olımpıadalarmen qatar sporttyq jetistikterimen de kózge túsip júr. Bul ujymnyń ǵana emes, ustazdar eńbeginiń jemisi, demeýshilerdiń qoldaýynyń nátıjesi. Bıyl 4 oqýshymyz mektepti qyzyl attestatqa bitirgeli otyr. Respýblıkalyq pánaralyq olımpıada jeńimpazdary Sh. Abdýlhaıqyzy, E. Musaqojaev, I. Jaqaı, T. Ibraeva, sonymen qatar M. Muhtarbek, M. Rysbaı, K. Baıgelova, sondaı-aq oqýshylarymyzdyń sporttaǵy jetistikteri de nazar aýdararlyq. Al mektep túlekteri qoǵamdyq ómirdiń san-salasynda tabysty eńbek etip júrgeni bizderdi qýantady», dedi Baqytgúl Ermekova.
Bilim ordasy jaryq ári jaıly synyptar, ınteraktıvti taqtalar, zerthanalar men jańa sheberhanalarmen jabdyqtalǵan. Mektepte balalardyń psıhologııalyq-fızıologııalyq erekshelikterine sáıkes arnaıy oqý baǵdarlamasyn qoldaný óz jemisin berip keledi. Pedagogıkalyq ujym zamanaýı múmkindikterdi qoldana otyryp, balalardyń qoǵammen yqpaldasýy úshin áleýmettik-psıhologııalyq ońaltý, jeke oqý úrdisi arqyly bilim berýge yntalandyrý, adaptıvti múmkindikterin arttyrý baǵytynda jumys istep keledi.
ALMATY
