Foto: Aqorda
Memleket basshysy Túrkııa Qazaqstan úshin baýyrlas el, mańyzdy ári senimdi seriktes sanalatynyn atap ótip, tamyry tereń baılanystar qos halyqtyń myzǵymas dostyǵyn odan ári nyǵaıtýǵa yqpal etip otyrǵanyn aıtty.
«Qazirgi tańda qazaq-túrik ekijaqty qarym-qatynasy keńeıtilgen strategııalyq seriktestik rýhynda qarqyndy damyp jatyr. Elderimizdiń arasynda eshqandaı túıtkil joq. Memleketaralyq jáne úkimetaralyq baılanystarymyz nyǵaıyp keledi. Parlamentaralyq yqpaldastyǵymyz da joǵary deńgeıde. Túrik delegasııasynyń quramynda bir top depýtattyń jáne partııa músheleriniń bolýy – sonyń aıqyn dáleli. Sonymen qatar eki eldiń ekonomıkalyq yntymaqtastyǵy kúsheıe tústi. Túrkııa iri ınvestorlarymyzdyń qataryna kiredi. Osy ýaqytqa deıin Sizdiń elińizden ekonomıkamyzǵa 6 mıllıard dollar ınvestısııa tartyldy. Qazaqstannyń Túrkııaǵa salǵan ınvestısııasy da ósip, 2,5 mıllıard dollarǵa jýyqtady. Sondaı-aq Túrik eli – negizgi bes saýda seriktesimizdiń biri. Qos halyqtyń mádenı-gýmanıtarlyq baılanystary qarym-qatynasymyzdyń altyn arqaýy sanalady. Biz osy ıgi úrdisti saqtap, ózara yqpaldastyǵymyzdyń aıasyn keńeıte berýge múddelimiz. Búgin «Máńgilik dostyq jáne keńeıtilgen strategııalyq seriktestik týraly» deklarasııany qabyldaımyz. Osy mańyzdy qujat qazaq-túrik qatynastaryn damytýǵa tyń serpin beretini anyq. Bul másele boıynsha eki eldiń de nıet-tilegi – bir, sondyqtan áleýetimiz de, múmkindigimiz de mol dep aıtýǵa tolyq negiz bar», dedi Qasym-Jomart Toqaev.
«Qadirli baýyrym»: Toqaev Túrkııa Prezıdentimen kezdesýinen foto jarııalady
Qazaqstan Prezıdenti búginde Túrkııa áleýmettik-ekonomıkalyq damýdyń jańa kezeńine qadam basyp, túrli salada eleýli tabysqa qol jetkizgenine nazar aýdardy.
«Sizdiń salıqaly, sarabdal saıasatyńyzdyń nátıjesinde Túrkııanyń álemdegi yqpaly men bedeli arta tústi. Túrik eli qýatty ekonomıka men salmaqty dıplomatııanyń arqasynda Eýropa men Azııany, kúlli túrki dúnıesin jalǵaǵan altyn kópir retinde tanylyp otyr. Memleketińizdiń jetistikteri – Sizdiń ult múddesin qorǵaý jolyndaǵy qajyrly eńbegińizdiń jemisi dep bilemiz», dedi Prezıdent.
Rejep Taııp Erdoǵan respýblıkalyq referendýmda halyq qoldaýyna ıe bolǵan jańa Konstıtýsııa Qazaqstannyń yntymaǵyn arttyra beretinine senim bildirdi. Sonymen qatar Túrkııa Prezıdenti eki el arasyndaǵy qarym-qatynas keńeıtilgen strategııalyq áriptestik aıasynda barlyq salada nyǵaıyp kele jatqanyn aıtty.
Memleket basshysy Túrkııa Prezıdentimen shaǵyn quramda kelissóz júrgizdi
«Qadirli baýyrymmen ótkizgen kezdesýde saýdadan bastap energetıka, qorǵanys ónerkásibi, kólik-logıstıka salalaryndaǵy yntymaqtastyq, sondaı-aq jahandaǵy ózekti máseleler sekildi kóptegen taqyrypta pikir almastyq. Biz saýda aınalymyn 15 mıllıard dollarǵa jetkizýge nıetti ekenimizdi rastadyq. Osy oraıda 15 sáýirde Astanada ótken Úkimetaralyq ekonomıkalyq komıssııanyń 14-shi otyrysynda qabyldanǵan 67 tarmaqtan turatyn Is-qımyl josparyn júzege asyrýdyń mańyzyna toqtaldyq. Investısııa salasynda kompanııalarymyzdy yntalandyrýdy jalǵastyramyz. Búgingi bıznes-forým sııaqty iskerlik ortany biriktiretin is-sharalar eki eldiń saýda-ekonomıkalyq baılanystaryn nyǵaıtý turǵysynan asa mańyzdy dep sanaımyn», dedi Túrkııa Prezıdenti.
Keńes otyrysynda taraptar saýda-ekonomıkalyq yqpaldastyqty tereńdetý máselesin talqylady.
Eske sala keteıik, keshe Túrkııa Respýblıkasynyń Prezıdenti Rejep Taııp Erdoǵan Qazaqstanǵa memlekettik saparmen keldi. 15 mamyrda Túrkııa Prezıdenti Túrkistan qalasynda Túrki memleketteri uıymyna múshe elder basshylarynyń beıresmı sammıtine qatysady.
