О́tken jyldyń qorytyndysy boıynsha taýar aınalymy 8,8 paıyzǵa ósip, 5,4 mıllıard dollardan asqan. Qasym-Jomart Toqaev saýda-sattyqty ári qaraı jandandyrýǵa qolaıly jaǵdaı jasap, alys-beristi ártaraptandyrýdyń mańyzyna toqtaldy.
Prezıdenttiń aıtýynsha, Qazaqstan Túrkııaǵa qazirdiń ózinde 34 taýar túri boıynsha eksport kólemin ulǵaıta alady. Onyń jalpy quny – 630 mıllıon dollardan asady. Bul rette Memleket basshysy eki eldiń qarjy ortalyqtary men sıfrlyq saýda platformalary arasyndaǵy seriktestiktiń, sondaı-aq búgin Astanada ótip jatqan qazaq-túrik bıznes-forýmynyń nátıjesi saýda-ekonomıkalyq baılanystardy odan ári tereńdete túsetinine senim bildirdi.
Memleket basshysy Túrkııa Prezıdentimen shaǵyn quramda kelissóz júrgizdi
Keńeste aýyl sharýashylyǵy salasyndaǵy yqpaldastyqqa aıryqsha mán berildi. Qasym-Jomart Toqaev Tiryaki Agro qolǵa alǵan glıýten men krahmal óndirisin, Alarko Holding salyp jatqan jylyjaı keshenin mysalǵa keltirdi. Túrkııa tarapyna Aýyl sharýashylyǵy ónimderiniń ózara saýdasyn jandandyrý jóninde 2026-2028 jyldarǵa arnalǵan jol kartasyn qabyldaý usynyldy.
Jıynda qazirgi geosaıası jaǵdaıda kólik-logıstıka salasynyń strategııalyq mańyzy arta túskenine nazar aýdaryldy. Memleket basshysy bul rette Transkaspıı halyqaralyq kólik dálizine ózge elderdiń qyzyǵýshylyǵy artyp kele jatqanyna toqtalyp, túrik kompanııalaryn Quryq, Aqtaý porttary arqyly júk tasymalyn ulǵaıtýdy kózdeıtin jobalarǵa belsendi atsalysýǵa shaqyrdy.
Sonymen qatar Prezıdent Túrkııa bıznesmenderin shıkizattyq emes jobalardy birlese iske asyrýǵa úndedi. Budan soń Memleket basshysy Túrkııa Prezıdentin «Qoja Ahmet Iаsaýı» ordenimen marapattady.
