Qasym-Jomart Toqaev mádenı-gýmanıtarlyq baılanys – qazaq-túrik qatynasynyń altyn kópiri ekendigin atap ótti.
«Bul mańyzdy másele árdaıym nazarda bolady. Sonyń ishinde bilim jáne ǵylym salasynyń orny erekshe. Búgin Gazıantep provınsııasyndaǵy jer silkinisinen zardap shekken azamattar úshin Qazaqstannyń atynan salynǵan jańa mekteptiń ashylý rásimi ótti. Bul – qazaq halqynyń túrik eline kórsetken qoldaýy men ystyq yqylasynyń aıqyn kórinisi. Sapar aıasynda tıisti mınıstrlikter Astana men Almatyda «Maarıf» qorynyń eki mektebin ashý týraly memorandýmǵa qol qoıǵanyn aıryqsha atap ótken jón. Osy mektepter sanaly urpaq tárbıeleıtin irgeli bilim ordasy retinde qyzmet etedi dep senemin. Bul mektepterdiń qurylysyna tıisti jer telimderin berý jóninde tapsyrma berildi. Kóp sozbaı qurylysty bastaımyz. Joǵary bilim berý salasyndaǵy yntymaqtastyq ta tabysty damyp keledi. Qazir 14 myńǵa jýyq azamatymyz Túrkııada oqyp jatyr. Sondaı-aq 260-qa jýyq túrik stýdenti elimizdiń joǵary oqý oryndarynda bilim alýda. Jaqynda Shymkent qalasyndaǵy pedagogıkalyq ýnıversıtettiń janynan Túrkııanyń Gazı ýnıversıtetiniń fılıaly jumys isteı bastaıdy. Aldaǵy ýaqytta ál-Farabı atyndaǵy Qazaq ulttyq ýnıversıteti Túrkııada fılıal ashýdy josparlap otyr. Biz bul ıgi bastamalardy jalǵastyryp, bilim berý, medısına, týrızm salasyndaǵy baılanysymyzdy nyǵaıta beremiz», dedi Prezıdent.
Memleket basshysy Túrkııa Prezıdentimen shaǵyn quramda kelissóz júrgizdi
Memleket basshysy Qazaqstan men Túrkııa arasynda ózara qurmet pen syılastyqqa, baýyrlastyq pen dostyqqa negizdelgen berik qarym-qatynas ornaǵanyna nazar aýdardy.
«Bul – Prezıdent Rejep Taııp Erdoǵannyń tikeleı qoldaýynyń arqasy ekeni sózsiz. Rejep beı eki eldiń birligin bekemdeýge aıryqsha úles qosýda. Sondaı-aq qoǵamdyq-saıası, áleýmettik jáne mádenı-gýmanıtarlyq saladaǵy qazaq-túrik yqpaldastyǵyn kúsheıtýge mol eńbek sińirip keledi. Sondyqtan men qadirli dosym, baýyrym Rejep Taııp Erdoǵandy túrki áleminiń rýhanı kósemi – Qoja Ahmet Yasaui ordenimen marapattadym. Muny barsha qazaq eliniń túrik jurtyna jáne Túrkııa Prezıdentine degen zor qurmetiniń kórinisi deýge bolady. Erdoǵan myrza osy bedeldi nagradanyń tuńǵysh ıegeri ekenin erekshe atap ótkim keledi», dedi Qasym-Jomart Toqaev.
Eske sala keteıik, buǵan deıin taraptar saýda-ekonomıkalyq yqpaldastyqty tereńdetý baǵytynda eki arasynda mańyzdy saýda kelisimderin jasasqan bolatyn.
