Memleket basshysy Qazaqstan-Italııa bıznes forýmyna qatysty

ASTANA. 28 maýsym. Memleket basshysy Italııa premer-mınıstri Matteo Rensımen birge Qazaqstan-Italııa bıznes forýmyna qatysty. Bul týraly akorda.kz habarlady. Eki eldiń isker toptarynyń qatysýymen ótken forýmda jalpy somasy 500 mıllıon dollar bolatyn, aýyl sharýashylyǵy tehnıkalary óndirisin, mashına jasaý, azyq-túlik, toqyma ónimderi salalaryn, munaı sektoryn jáne qurylys salalaryn qamtıtyn 20 qujatqa qol qoıyldy. Nursultan Nazarbaev bıznes-forýmǵa qatysyp otyrǵan bıznesmenderdiń kópshiligi Qazaqstanda kópten beri jumys isteıtinin jáne elimizdegi múmkindikter men uzaqmerzimdi perspektıvalardy jaqsy biletinin atap ótti. «Biz sizderdiń ashyq suhbatqa, óńirdegi jáne álemdegi qazirgi saıası konıýnktýraǵa táýelsiz syndarly yntymaqtastyqqa degen nıetterińizdi joǵary baǵalaımyz. Álemdik ekonomıkadaǵy ahýalǵa qaramastan, biz bolashaqqa birlesken josparlar quryp otyrmyz. Olardyń kópshiligi qazirdiń ózinde tabysty júzege asyryldy jáne naqty iskerlik jobaǵa aınaldy. Osynyń bári bizdiń bir-birimizge sene otyryp, seriktes retinde jumys istegenimizdiń arqasy», – dedi Memleket basshysy. Qazaqstan Prezıdenti eki el arasyndaǵy saýda-ekonomıkalyq jáne ınvestısııalyq yntymaqtastyq turaqty damyp kele jatqanyn aıtty. «О́zara taýar aınalymy jyl saıyn ósip keledi, byltyr ol 17 mıllıard dollar boldy. Italııa – Qazaqstan ekonomıkasynyń iri ınvestorlarynyń biri. 2005 jyldan beri Italııadan kelgen tikeleı ınvestısııalar aǵyny 6 mıllıard dollarǵa jýyqtady. Qazirgi ýaqytta bizdiń elimizde ıtalııalyq kapıtaldyń qatysy bar 200 kásiporyn jumys isteıdi. О́zara tıimdi yntymaqtastyǵymyzdy odan ári nyǵaıtyp, ekonomıkanyń túrli salalarynda yqpaldasý múmkindikterin tabý kerek dep esepteımin», – dedi Nursultan Nazarbaev. Memleket basshysy qolaıly ınvestısııalyq ahýal qalyptastyrý bizdiń eldiń basty basymdyqtarynyń biri bolǵanyn jáne solaı bolyp qala beretinin atap ótti. «Elimizde jumys isteıtin sarapshylar men ınvestorlardyń baǵalaýy boıynsha, búginde Qazaqstanda ınvestısııa úshin Ortalyq Azııadaǵy eń jaqsy jaǵdaı jasalǵan. Dúnıejúzilik bank respýblıkamyzdy ınvestısııa salý úshin eń qolaıly el retinde moıyndady. Sonymen qatar, Qazaqstannyń halyqaralyq qaryz deńgeıi tómen, al rezervterimiz 100 mıllıard dollardan asady», – dedi Qazaqstan Prezıdenti. Nursultan Nazarbaev ınvestorlar úshin jasalǵan aıryqsha jaǵdaılarǵa nazar aýdardy. «Elimizde 10 arnaýly ekonomıkalyq aımaq jumys isteıdi. Osy aýmaqtarda kásipkerlerge jan-jaqty qoldaý kórsetiledi. Salyq jeńildikteri bar. Basymdyǵy bar salalardaǵy ınvestorlar korporatıvtik tabys salyǵyn jáne jer salyǵyn tóleýden 10 jylǵa, múlik salyǵynan 8 jylǵa bosatylǵan. Investorlarǵa salyq zańnamasynyń turaqtylyǵyna kepildik beriledi. Memleket ekonomıkanyń basymdyǵy bar salalardaǵy nysandardy paıdalanýǵa bergennen keıin kúrdeli shyǵystardyń 30 paıyzyn ótep berýge daıyn», – dedi Memleket basshysy. Qazaqstan Prezıdenti respýblıkamyzdyń ashyq eńbek naryǵyn qalyptastyrýdy kózdep otyrǵanyn da aıtty. «Investorlardyń sheteldik jumys kúshin qandaı da bir kvotasyz jáne ruqsatsyz ákelýge múmkindigi bar. Sonymen qatar, álemniń 10 eliniń ınvestorlary úshin vızasyz rejim ornatylǵan, bul tizimge Italııa da kiredi. Bıylǵy 15 shildeden bastap ınvestorlar úshin vızasyz rejimdi uzartamyz. Onyń qatary taǵy 10 el – Shveısarııa, Ispanııa, Belgııa, Vengrııa, Monako, Sıngapýr, Avstralııa, Norvegııa, Shvesııa jáne Fınlıandııa arqyly tolyǵady. Álemde ınvestorlar úshin osyndaı sharttar usynatyn memleketter kóp emes dep oılaımyn», – dedi Nursultan Nazarbaev. Memleket basshysy Qazaqstan iskerlik ahýaldy jaqsartýǵa baǵyttalǵan ınstıtýsıonaldyq reformalardy jalǵastyryp jatqanyn atap ótti. «Kelesi jyly Astanada Halyqaralyq qarjy ortalyǵy jumysyn bastaıdy. Investorlar úshin biz ınvestısııalyq máselelerdi sot óndirisi aǵylshyn tilinde bolatyn jáne sheteldik sýdıalardy tartatyn aǵylshyn quqyǵynyń normalaryna negizdelgen quqyqtyq retteýdi usynatyn bolamyz. Korporatıvtik jáne jeke tabys salyǵynan 10 jylǵa bosatý, sheteldik mamandardy jeńildikpen tartý máseleleri qarastyrylǵan. Qazaqstanda elimizdiń isker toptarynyń ókilderi men sheteldik kásipkerlerdiń jumysyna atsalysý úshin Prezıdent janynan Sheteldik ınvestorlar keńesi qurylǵan. Keńes túrli máselelerdi, sonyń ishinde sheneýnikter tarapynan jasalatyn kedergilerdi, salyq problemalaryn talqylaý úshin turaqty túrde ótip turady», – dedi Qazaqstan Prezıdenti. Nursultan Nazarbaev ınvestısııalyq tartymdylyqty arttyrýǵa kóp jaǵdaıda Eýrazııalyq ekonomıkalyq odaqtyń jumysy yqpal etip otyrǵanyna nazar aýdardy. «Eń tómengi salyqtar, ákimshilik kedergilerdi joıý, memlekettik retteýdiń boljamdylyǵy, ınvestorlar men memlekettiń ózara qarym-qatynasynyń turaqtylyǵy bizdiń eldi 180 mıllıon halqy jáne kólemi 2 trıllıon dollardan astam IJО́ bar Eýrazııalyq ekonomıkalyq odaqtyń alyp naryǵyna kirý úshin eń «jaqsy qaqpa» retinde kórsetedi. Biz elimizdiń ınvestısııalyq ahýalyn budan ári de jetildire beretin bolamyz», – dedi Memleket basshysy. Qazaqstan Prezıdenti bizdiń elimiz jańa Jibek jolynyń ekonomıkalyq áleýetin iske asyrýǵa qatysyp jatqanyn atap ótti. Atap aıtqanda, quryltaıshysynyń biri respýblıkamyz bolyp sanalatyn Infraqurylymdyq damýdyń azııalyq banki quryldy. Budan bólek, Qazaqstan tıisti kólik ınfraqurylymyn qalyptastyrýda. Nursultan Nazarbaev Astanada ótetin EKSPO-2017 kórmesi energetıka salasyndaǵy ozyq álemdik ázirlemeler men trendterdi kórsetý úshin tıimdi alań bolatynyn aıtty. «Kórme bizdiń jemisti yntymaqtastyǵymyzǵa da qýatty serpin beredi. Sizderdiń barshańyzdy EKSPO-2017 kórmesine qatysýǵa shaqyramyn. Búgingi forým Qazaqstan men Italııa arasyndaǵy qarym-qatynastyń nyǵaıýy jolyndaǵy taǵy bir eleýli qadamǵa aınalatynyna senimdimin», – dedi Qazaqstan Prezıdenti. Sondaı-aq, Memleket basshysy eki eldiń tek ekonomıkalyq qana emes, mádenı jáne bilim berý salasyndaǵy qarym-qatynastar arqyly da tyǵyz baılanysta ekenine nazar aýdardy. Italııa premer-mınıstri ekonomıkalyq yntymaqtastyqpen qatar eki el de jer sharyndaǵy beıbitshilikti saqtaý, adamdar arasyndaǵy ózara túsinistik, mádenıetterdiń ózara ushtasýy ıdeıasyn jaqtaıtynyn atap ótti. «Azııa men Eýropanyń barlyq elderi planetamyzdy ekstremızmnen, dinı fanatızmnen qorǵaý jolynda yntymaqtasqany mańyzdy. Bizder den qoıýǵa tıis birinshi element – ózara qurmet, kómek jáne tózimdilik arqyly beıbitshilik pen qundylyqtardy qorǵaý jolyndaǵy geosaıası deńgeıde birlesken kúsh-jiger», – dedi Matteo Rensı. Ol Nursultan Nazarbaevtyń basshylyǵymen Qazaqstan táýelsizdik jyldary Eýropa men Azııa arasyndaǵy «dıalog arnasyna» aınalǵanyn, iskerlik toptar ókilderi úshin de bul mańyzdy jaıt bolyp sanalatynyn atap ótti. M.Rensı agroónerkásip pen energetıka salasyndaǵy áleýetti iske asyrý, sondaı-aq, joǵary oqý oryndary arasynda tájirıbe jáne stýdentter almasý qajettigine toqtaldy. Bıznes-forým barysynda qol qoıylǵan negizgi qujattar: – «Isataı» ýchaskesindegi barlaý jáne óndirý jobasyna qatysýdaǵy úlesin berý jónindegi «QazMunaıGaz» UK» AQ men «Enı Isataı B.V.» kompanııasy arasyndaǵy kelisim; – Qazaqstan Respýblıkasy Investısııalar jáne damý mınıstrligi men ıtalııalyq «Tenaris» kompanııasy arasyndaǵy ózara túsinistik týraly memorandým; – Qazaqstan Respýblıkasy Investısııalar jáne damý mınıstrligi men ıtalııalyq «Metalfar Prodotti Industriali SPA» kompanııasy arasyndaǵy ózara túsinistik týraly memorandým; – Qazaqstan Respýblıkasy Investısııalar jáne damý mınıstrligi men ıtalııalyq «Italcementi Group» kompanııasy arasyndaǵy ózara túsinistik týraly memorandým; – «Kaznex Invest» eksport jáne ınvestısııalar jónindegi ulttyq agenttigi» AQ men ıtalııalyq «Inalca S.p.A.» kompanııasy arasyndaǵy ózara túsinistik týraly memorandým; – «QazMunaıGaz» UK AQ men ıtalııalyq DRILLMEC S.p.A. kompanııasy jáne Aksai Industrial Park LLP arasyndaǵy nıettestik týraly memorandým; – Astana qalasy ákimdigi, Qazaqstannyń Mashına qurastyrýshylar odaǵy jáne ANIMA mashına qurastyrý ónerkásibiniń ıtalııalyq qaýymdastyǵy federasııasy arasyndaǵy yntymaqtastyq týraly memorandým. Elaman Qońyr. Derek, sýret: akorda.kz.