Foto: Ashyq derekkóz
Elde 2011 jylǵa deıin balabaqsha ashý úshin memleketten arnaıy ruqsat alý mindetti bolǵan. Keıin mektepke deıingi oryn tapshylyǵyn azaıtý maqsatynda lısenzııalaý alynyp tastaldy. Sonyń nátıjesinde jekemenshik balabaqshalar sany kúrt kóbeıip, ata-analardyń tańdaý múmkindigi artty.
Alaıda ýaqyt óte kele salada qaýipsizdik, kadr daıarlyǵy men bilim sapasyna qatysty máseleler týyndaǵan. Mamandardyń aıtýynsha, balabaqshalar sany standarttardan jyldam ósken.
24.kz málimetinshe, qazir el boıynsha 12 myńnan astam mektepke deıingi uıym jumys isteıdi. Onyń ishinde shamamen 5 myńy memlekettik, al 6 myńǵa jýyǵy jekemenshik balabaqsha.
Oqý-aǵartý mınıstrligine qarasty Bilim sapasyn qamtamasyz etý komıtetiniń bas sarapshysy Quralaı Ábeýovanyń aıtýynsha, jańa júıe eń aldymen sapasyz qyzmet kórsetetin uıymdardy naryqtan yǵystyrýǵa baǵyttalǵan.
«Lısenzııa alý úshin uıym aldyn ala tekserýden ótip, materıaldyq-tehnıkalyq bazasynyń, ǵımaratynyń jáne bilikti tárbıeshiler men pedagogterdiń bar ekenin dáleldeýi kerek», dedi ol.
Sarapshylardyń málimetinshe, eldegi balabaqshalardyń 96% memlekettik tapsyrys alady. Biraq kásipkerler memlekettik tapsyrys kólemi naqty shyǵyndardy tolyq jappaıtynyn aıtady. Qarajattyń basym bóligi mindetti talaptardy oryndaýǵa jumsalyp, bilim berý baǵdarlamalaryn jańartýǵa nemese ınfraqurylymdy jaqsartýǵa múmkindik az qalady.
Jekemenshik balabaqsha men mektep quryltaıshysy, «Ádilet» respýblıkalyq mektepke deıingi jáne orta bilim berý qaýymdastyǵynyń tóraıymy Dınara Qudaıqulova sapaly qyzmet kórsetetin ortalyqtar memleket qoldaýynsyz da jumys isteı alatynyn aıtty.
«Alǵashqy jyldary qıyn boldy. Biraq ata-ana árdaıym sapany tańdaıdy. Qazir lısenzııasy bar mektep quramynda bolǵandyqtan, bizdiń balabaqsha da tekserýden ótedi. Al memlekettik tapsyrys almaıtyn keıbir uıymdar baqylaýdan tys qalyp jatady», dedi ol.
Sonymen qatar kásipkerler jańa talaptardyń aýyrtpalyǵy artýy múmkin ekenin de jasyrmaıdy. «Atameken» ulttyq kásipkerler palatasy janyndaǵy áıelder kásipkerligin damytý komıtetiniń tóraıymy Leıla Kúlenovanyń aıtýynsha, lısenzııa alý talaptary memlekettik tapsyrys alý sharttaryna óte uqsas.
«Balabaqsha barlyq normatıvke tolyq saı bolýy kerek. Bul – ádistemelik quraldar, damytýshy jabdyqtar jáne qajetti pedagogıkalyq quram degen sóz. Qazir mundaı talaptarǵa barlyq uıym birdeı sáıkes kele bermeıdi», dedi ol.
Ulttyq palata ókilderi lısenzııalaý júıesi keıbir jekemenshik balabaqshalardyń kóleńkeli naryqqa ketýine áser etýi múmkin ekenin de joqqa shyǵarmaıdy. О́ıtkeni talaptardy oryndaı almaǵan uıymdar zańsyz jumys isteýge tyrysýy yqtımal.
Jańa tártip kelesi jyldan bastap kúshine enedi. Onyń mektepke deıingi bilim berý salasyna qalaı áser etetini ýaqyt óte belgili bolady.
