Foto: yandex.kz
Túzetýlerge sáıkes, ádilet organdarynyń ókilettigi keńeıtiledi. Sonymen qatar notarıýs lısenzııasynyń qoldanysyn 6 aıǵa deıin toqtata turýdyń qosymsha negizderi engiziledi.
Mundaı sharalar notarıýs «Derbes derekter jáne olardy qorǵaý týraly» zań talaptaryn buzǵan jaǵdaıda qoldanylýy múmkin.
Sondaı-aq lısenzııanyń qoldanysyn ýaqytsha toqtata turýdyń jańa negizderi aıqyndaldy. Atap aıtqanda:
– notarıýs memlekettik qyzmette bolǵan kezde;
– Qazaqstan Parlamentiniń depýtaty nemese turaqty negizde qyzmet atqaratyn, memlekettik bıýdjetten qarjylandyrylatyn máslıhat depýtaty bolyp saılanǵan kezeńde lısenzııanyń kúshi toqtatyla turady.
Jańa zań: Jeke derekterdi zańsyz paıdalanǵan notarıýstar lısenzııasynan aıyrylady
Zań jobasynda elektrondyq qujattar men elektrondyq sıfrlyq qoltańba talaptaryn buzǵan notarıýstardy lısenzııasynan aıyrý máselesi de qarastyrylǵan.
Qujatta notarıaldyq elektrondyq arhıv qurý tártibi de naqtylanady. Budan bólek, notarıat qyzmetimen aınalysýǵa lısenzııasy bola tura, 5 jyldan astam ýaqyt mamandyǵy boıynsha jumys istemegen azamattarǵa mindetti biliktilikti arttyrý talaby engiziledi.
Depýtattardyń pikirinshe, bul ózgerister notarıat salasyndaǵy jaýapkershilikti kúsheıtip, azamattardyń quqyqtaryn qorǵaý tetikterin jetildirýge múmkindik beredi.
Eske salaıyq, Májilistiń jalpy otyrysynda depýtattar Salyq kodeksine ózgerister engizý týraly zań jobasyn birinshi oqylymda maquldady.
