KTK arnasynyń málimetinshe, 11 jastaǵy Ámir sońǵy qońyraý merekesine daıyndalyp júrgen. Alaıda qazir ol merekeniń ornyna aýrýhana tósegine tańylǵan. Birneshe kún buryn bala dostarymen úı mańyndaǵy oıyn alańynda oınap júrgen kezde ushy shyǵyp turǵan temirge súrinip qulap, jaraqattanǵan.
Balanyń týysy Danara Darısheva jaraqattyń óte aýyr bolǵanyn aıtqan.
– Jarany sózben jetkizý múmkin emes. Aıaǵyndaǵy kesilgen jer óte tereń boldy. Dárigerler ony shuǵyl túrde operasııaǵa alyp kirip, tigis saldy. Qazir bul alań ıesiz qalǵandaı. Ákimdik merdigerdi, merdiger ákimdikti kinálaıdy. Al jaz boıy balalar osy jerde oınaıdy, biraq munda qaýipsizdik joq, – dedi ol.
Qazir Ámir sol aıaǵyn tolyq basa almaıdy jáne qatty aýyrsynýǵa shaǵymdanady. Dárigerlerdiń aıtýynsha, eger temir istik arterııaǵa tıgende jaǵdaı áldeqaıda aýyr bolýy múmkin edi.
Ákimjan Áýbákirov balanyń jambas tusynan jyrtylǵan jaraqatpen túskenin aıtty. Oǵan alǵashqy hırýrgııalyq kómek kórsetilip, jarasyna tigis salynǵan. Qazirgi jaǵdaıy qanaǵattanarlyq dep baǵalanyp otyr.
Tarazda mektep aýmaǵynda bıiktikten qulaǵan oqýshy aýyr jaraqat aldy
Oqıǵa bolǵan oıyn alańy Keńes Nokın turǵyn alaby aýmaǵynda eki jyl buryn «Halyq qatysatyn bıýdjet» baǵdarlamasy aıasynda salynǵan. Alańdy ornatýǵa bastamashy bolǵandardyń biri – jaraqat alǵan Ámirdiń ákesi. Ol turǵyndardy jınap, qajetti qujattardy rásimdegen.
Alaıda sheneýnikter oıyn alańy kóptegen zańbuzýshylyqpen salynǵanyn moıyndady. Sol sebepti nysan áli kúnge deıin ákimdik balansyna qabyldanbaǵan.
Aqtóbe qalasy Almaty aýdany ákimdiginiń turǵyn úı-kommýnaldyq sharýashylyq bóliminiń bas mamany Jádiger Baltabaı sot saraptamasy alańnyń sapasyz salynǵanyn anyqtaǵanyn málimdedi. Onyń aıtýynsha, merdiger kompanııa atqarylǵan jumys úshin tólem ala almaǵan. Qazir bul másele boıynsha is Joǵarǵy sotta qaralyp jatyr.
Oıyn alańynyń quny 33 mıllıon teńgeni quraǵan. Al ázirge sot daýy jalǵasyp jatqanda, balalar qaýipti konstrýksııalar arasynda oınaýǵa májbúr bolyp otyr.
