Elimizdiń Kongo Respýblıkasyndaǵy Tótenshe jáne ókiletti elshisi Jan Ǵalıev Kongoda eldiń syrtqy saıası vedomstvosynyń basshysy Konstan-Serj Býndamen, Telekommýnıkasııa jáne sıfrlyq ekonomıka mınıstri Ngema Nzemen, Qarjy jáne bıýdjet mınıstri Krıstıan Iokamen, sondaı-aq Ulttyq qorǵanys mınıstrliginiń Strategııalyq máseleler jáne áskerı yntymaqtastyq jónindegi bas dırektory Jan Eme Inıýmbamen kelissóz ótkizdi.
Elimizdiń sıfrlandyrý jáne jasandy ıntellekt, telekommýnıkasııa, energetıka, kólik-logıstıkalyq ınfraqurylymdy damytý, qarjylyq tehnologııalar, bank isi salasyndaǵy tájirıbesi men jetistigi Kongo Respýblıkasynyń erekshe qyzyǵýshylyǵyn týdyryp otyr. Qazir Brazzavıl Ortalyq Afrıkanyń búkil aımaǵy úshin Qazaqstannan astyq pen tyńaıtqyshtar ımporttaý múmkindikterin qarastyryp otyr. Sondaı-aq kongolezdik jastardy elimizdiń bilim mekemelerine oqýǵa jiberýge nıetti.
Brazzavıl Prezıdent Qasym-Jomart Toqaevtyń BUU qurylymynda Halyqaralyq sý uıymyn qurý týraly bastamasyn qoldaıdy. Syrtqy ister mınıstri Konstan-Serj Býnda sý qaýipsizdigi taqyryby barlyq el úshin, ásirese Afrıka úshin óte mańyzdy másele ekenin atap ótti.
Elshi Kongoǵa sapary kezinde kongolezdik bıznestiń jetekshi ókilderiniń biri, kópsalaly kompanııanyń bas dırektory Serj Mýıımen ótken kezdesýde týrızm jáne saýda salalaryndaǵy, atap aıtqanda memlekettik-jekemenshik seriktestigi sheńberindegi bıznes-yntymaqtastyqtyń keleshegin talqylady.
Kongo bıligi eki eldi Orta dáliz jáne Pýent-Nýar teńiz porty arqyly baılanystyrý saýda-ekonomıkalyq seriktestik múmkindikterin aıtarlyqtaı keńeıte alatynyn aıtady.
