Aqtóbede 9 eldiń ǵalymdary qatysqan ǵylymı konferensııa ótti

AQTО́BE. 15 mamyr. Aqtóbedegi Qudaıbergen Jubanov atyndaǵy óńirlik memlekettik ýnıversıtetinde 2 kúnge sozylǵan «Dıskýrs teorııasynyń ózekti máseleleri» atty halyqaralyq ǵylymı konferensııa ótti. Bul týraly oblystyq «Aqtóbe» gazeti habarlady. Atalǵan taqyrypqa arnalǵan ǵylymı basqosý osymen 4-ret uıymdastyryldy. Bıylǵy konferensııaǵa 9 elden 100-ge jýyq ǵalym óz maqalalaryn, baıandamalaryn usyndy. Plenarlyq májiliste Ahmet Baıtursynuly atyndaǵy til bilimi ınstıtýty leksıkologııa bóliminiń meńgerýshisi, fılologııa ǵylymdarynyń doktory, professor Jamal Mankeeva, Mıhaıl Lomonosov atyndaǵy Máskeý memlekettik ýnıversıtetiniń professory, fılologııa ǵylymdarynyń doktory Alla Nazarenko, Qytaıdyń Ile pedagogıkalyq ýnıversıtetiniń fılologııa fakýlteti qazaq tili men ádebıeti kafedrasynyń dosenti Ábdihalyq Ospanqaryuly, Úndistandaǵy Djammý ýnıversıtetiniń professory Sıngh Manhas Parıkshat jáne taǵy basqa ǵalymdar tushymdy da tujyrymdy baıandamalaryn oqydy. Satybaldy Sáýirbaı. Derek, sýret: «Aqtóbe» gazeti.