Sýret: ulan.kazgazeta.kz
Muǵaljar aýdanynyń Embi qalasynda 1977 jyly mýzyka mektebiniń fılıaly ashylyp, onda alǵash ret belgili kúıshi, Mádenıet qaıratkeri Sálıma Aldabergenova dáris bere bastady. Osy bilim oshaǵynda tálim alǵan kóptegen shákirt keıin óner jolyn tańdap, elimizdiń ár óńirinde mádenıet salasynyń damýyna úles qosyp keledi. Olardyń qatarynda álemge áıgili ánshi Dımash Qudaıbergenniń ákesi Qanat Aıtbaev, kásibı qobyzshy ári jetigen aspabynyń tanymal sheberi Baqyt Myrzabekova, sondaı-aq Aslanbek Janasaev, Shárbat Kishibaeva, Ulbolsyn Muhanbetova, basqa da óner ıeleri bar.
Búginde Embi qalasynda bes jalpy bilim beretin mektep jumys isteıdi. Alaıda mýzyka mektebi fılıalynda nebári eki muǵalim qyzmet atqaryp, bar bolǵany 25 bala bilim alyp júr. Sabaq Embi qalalyq aýla klýbynyń eki shaǵyn bólmesinde ótkiziledi. Balalaryn mýzyka mektebine bergisi keletin ata-analar kóbeıgenimen, muǵalimder shtat birliginiń jetkiliksizdigin alǵa tartyp, jańa oqýshylardy qabyldaı almaı otyrǵandaryn aıtady. Sonyń saldarynan ónerge qyzyǵýshylyq tanytqan kóptegen bala qosymsha bilim alý múmkindiginen qaǵylyp otyr.
Bul másele jyl saıyn qaıtalanady. Ata-analar men turǵyndar tarapynan aýdandyq deńgeıde birneshe ret kóterilgenimen, ázirge naqty nátıje baıqalmaı otyr. Embi qalasynda derbes mýzyka mektebin ashatyn ýaqyt áldeqashan jetken sııaqty. Eger mundaı múmkindik ázirge bolmasa, eń bolmasa qosymsha shtat birlikterin bólip, balalardy kóbirek qabyldaýǵa jaǵdaı jasaý qajet.
Embi qalasynda qosymsha bilim beretin mekemeler bar. Atap aıtqanda, aýdandyq oqýshylar shyǵarmashylyǵyn damytý ortalyǵy men qalalyq aýla klýbynda dombyra úıirmeleri jumys isteıdi. Qazir bul úıirmelerge shamamen 70 bala qatysady. Alaıda munda dombyradan ózge mýzykalyq aspaptardy úıretetin baǵyttar joq. Onyń ústine, bul – úıirme bolǵandyqtan sabaqtar toptyq formatta ótedi. Ár oqýshymen jeke jumys júrgizý múmkin emes. Al mýzyka mektebinde ár balaǵa jeke kóńil bólinip, aspapty kásibı deńgeıde meńgerýge jaǵdaı jasalady. Munda nota saýaty oqytylyp, júıeli mýzykalyq bilim beriledi. Sondyqtan mýzyka mektebi men úıirmeniń múmkindigin salystyrýǵa kelmeıdi.
Mýzyka mektebi – jas urpaqty ónerge baýlyp qana qoımaı, olardyń rýhanı jáne mádenı dúnıetanymyn qalyptastyratyn, bolashaq talanttardyń kásibı turǵydan shyńdalýyna jol ashatyn mańyzdy bilim oshaǵy. Belgili pedagog Vasılıı Sýhomlınskııdiń: «Mýzyka tyńdatpaıynsha tárbıe berý, balalyq shaqtyń ózinde adamnyń súıip tyńdaıtyn án-kúılerinsiz tárbıe berý degen meniń basyma qonbaıtyn nárse», degen sózi osynyń aıqyn dáleli.
Biz – akademık, ǵalym, kompozıtor, qazaq halyq aspaptar orkestriniń negizin qalaýshy Ahmet Jubanovtyń týǵan jurtymyz. Sondyqtan balalardyń ónermen aınalysýyna jaǵdaı jasaý – barshamyzdyń ortaq mindetimiz. Ár balanyń boıyndaǵy qabiletti ashyp, ónerge jol tabýyna múmkindik berý maqsatynda tıisti jaǵdaı jasalýy qajet dep sanaımyz.
Embi qalasynda balalar men jastardyń bos ýaqytyn tıimdi uıymdastyrýǵa arnalǵan mádenı-shyǵarmashylyq ortalardyń tapshylyǵy aıqyn seziledi. Sonyń saldarynan kóptegen jas óner men shyǵarmashylyqtan alshaqtap, óz qabiletterin damytýǵa múmkindik taba almaı otyr. Jastardyń bir bóligi týǵan jerinde bolashaǵyn kórmeı, úlken qalalarǵa ketýge umtylady.
Balalardy ónerge baýlýǵa suranys joǵary bolǵanymen, kadr tapshylyǵy men shtat birlikteriniń jetkiliksizdigi máseleni kúrdelendirip tur.
Embi qalasynda mýzyka mektebin ashý nemese qoldanystaǵy fılıaldyń materıaldyq-tehnıkalyq bazasy men kadrlyq áleýetin kúsheıtý – jas urpaqtyń mádenı tárbıesine, kásibı baǵdar alýyna jáne óńirdiń rýhanı damýyna qyzmet etetin mańyzdy qadam bolar edi.
Myrzaǵalı Rahmanov,
mýzyka pániniń muǵalimi, Halyq ult aspaptary orkestriniń kórkemdik jetekshisi
Aqtóbe oblysy
