Aýrýhana dırektory Múslim Soltanovtyń aıtýynsha, oblys ákimdigi men densaýlyq saqtaý basqarmasy qoldaýynyń arqasynda emdeý mekemesindegi medısınalyq jabdyqtar jańaryp jatyr. Somatıkalyq jáne hırýrgııalyq bólimde tósek-oryn 100 paıyz
jańarǵan.
«Bul qoldaýdyń negizgi maqsaty – medısınalyq kómektiń sapasy men qaýipsizdigin arttyrý. Bıyl aýrýhanaǵa arnaıy medısınalyq, jumsaq jáne qatty tósek jabdyqtary satyp alyndy. Bul kishkentaı emdelýshilerimizdiń em alý jaǵdaıyn jaqsartýǵa múmkindik beredi», deıdi mekeme basshysy.
Máselen, travmatologııa bólimshesine kúıik shalǵan naýqastardy emdeýge arnalǵan arnaıy tósekke qajetti keramıkalyq mıkrosferalar men súzgi-jaımalar satyp alynǵan. Bul jabdyqtar kúıik shalǵan balalardy emdeý sapasyn jaqsartady. Denesiniń kóp bóligin kúıik shalǵan balalar arnaıy kúıikke qarsy tósekte em qabyldaıdy. Mundaı jabdyq emdeý úderisiniń tıimdiligin arttyryp, asqynýlardyń aldyn alýǵa kómektesedi. Aýyr kúıik alǵan balalar kóp kezdespegenimen, túrli kúıik jaraqatymen jetkinshekter jıi túsip turady. Sondyqtan arnaıy jabdyqtardyń úzdiksiz jumys isteýi mańyzdy.
Buǵan qosa ınfeksııalyq stasıonardaǵy barlyq eski matrastar zamanaýı úlgige aýystyrylǵan. Jańa matrastardy kameralyq óńdeýden ótkizbeı-aq arnaıy hımııalyq tásilmen zararsyzdandyrýǵa bolady. Bul sanıtarlyq talaptardy saqtaýdy jeńildetedi. Somatıkalyq jáne hırýrgııalyq korpýstar úshin eresekter men balalarǵa arnalǵan túrli modıfıkasııadaǵy 260-qa jýyq tósek satyp alynǵan. Sanıtarlyq-gıgıenalyq talaptardy saqtaý maqsatynda jańa kir jýatyn, keptiretin mashınalar da alynǵan.
Aýrýhana basshysynyń aıtýynsha, materıaldyq-tehnıkalyq bazany jańartý jumysy kezeń-kezeńimen jalǵasady. Kelesi jyly týmbalar, ústelder, oryndyqtar sııaqty jıhaz jabdyqtaryn jańartý josparlanyp otyr.
Oblys ortalyǵynyń turǵyny Ásemgúl Jumasheva birneshe kúnnen beri eki jasar ulymen aýrýhanada em qabyldap jatyr eken. Aıtýynsha, aýrýhanadaǵy naýqastarǵa jasalǵan jaǵdaı kóńilinen shyqqan.
«Balam ýlanyp qalyp, qatty ýaıymdadym. Dárigerler der kezinde kómek kórsetip, barlyq qajetti em-sharalardy júrgizdi. Medısınalyq qyzmetkerler óte sypaıy, árdaıym jaǵdaıymyzdy surap, kómektesip otyrady. Palatadaǵy jaǵdaı da jaqsy, bólmeler taza ári jaryq. Buǵan deıin balalarmen aýrýhanada jatyp kórmegen edim, sondyqtan alǵashynda alańdadym. Biraq munda bári jaqsy uıymdastyrylǵan», deıdi ana.
Qazirde oblystyq balalar aýrýhanasynyń somatıkalyq jáne hırýrgııalyq bólimshelerinde 162 bala, ınfeksııalyq stasıonarda 133 bala em qabyldap jatyr.
Pavlodar oblysy
