Konsert baǵdarlamasy kórermendi ár dáýirdiń estetıkalyq álemine jetelep, qımyl men yrǵaq arqyly tarıhtyń tynysyn sezindirýge baǵyttaldy. Sahnada pavana, menýet, polonez, vals, tango, latıno jáne qazaq valsi qatar órilip, árbir bı óz dáýiriniń rýhyn, minezin hám kórkemdik bolmysyn aıqyndady. Eýropalyq saraı mádenıetinen bastaý alǵan klassıkalyq úlgiler men HH ǵasyrdyń yrǵaqty plastıkasy ulttyq horeografııanyń tól boıaýymen astasyp, tutas kórkem jeli túzdi.
Jobanyń basty ereksheligi – bı óneriniń tarıhyn sahna arqyly baıandap qana qoımaı, ony tanymdyq keńistikke aınaldyrýynda. Ár kompozısııa tek qımyl tili emes, mádenı jadynyń kórinisi retinde usynylyp, kórermendi dáýirler arasyndaǵy názik baılanystardy sezinýge jeteledi.
Keshtiń avtorlary – «Gulder» ansambliniń bas baletmeısteri, halyqaralyq baıqaýlardyń laýreaty Anvara Sadyqova men pedagog-horeograf Dana Qýanyshbekova. Jobaǵa ansambl ártisteri, óner maıtalmandary, halyqaralyq baıqaýlar jeńimpazdary, Qazaq ulttyq horeografııa akademııasynyń stýdentteri men «Samga» kvarteti qatysyp, sahnalyq keńistikti kópqyrly óner alańyna aınaldyrdy.
Dáýirler úni dıalog qurǵan aıtýly bı keshinde erekshe kórkemdik ekpin qazaq valsine berildi. Bul bólim ulttyq plastıkanyń názik lırızmin aıqyndap, kórermenge qazaq bı óneriniń zamanaýı sahnadaǵy jańǵyrýyn áıgiledi. Konsert sońynda dástúr men jańashyldyqtyń toǵysy bı tili arqyly úılesim taýyp, ónerdiń ýaqyttan bıik tabıǵatyn taǵy bir márte dáleldedi.
