Mobıldi front-ofıs degenimiz – mamandandyrylǵan shaǵyn avtobýs. Onda «Damý» qorynyń konsýltanttary, ákimdikterdiń, ekinshi deńgeıli bankterdiń, «Atameken» UKP, «Agrarlyq kredıttik korporasııa» AQ, «QazAgroQarjy» AQ jáne konsaltıngtik uıym ókilderi aýyl-qalalarǵa barady. Kásipkerler qoldanystaǵy memlekettik qoldaý sharalary boıynsha jergilikti jerde keńes alyp, qarjylandyrý baǵdarlamalaryna qatysýǵa ótinim bere alady.
Mobıldi front-ofısterdiń jumysy sheńberinde kásipkerlerge sýbsıdııalaý, kepildikpen jeńildetilgen kredıt berý, mıkroqarjylandyrý, lızıng, eksporttyq jobalardy qoldaý quraldary, sondaı-aq oqytý, konsýltasııalyq súıemeldeý men kásipkerlik quzyretti damytý sekildi qarjysyz qoldaý sharasy boıynsha aqparat beriledi.
Búginde mobıldi front-ofıster Ulytaý, Jetisý, Abaı, Soltústik Qazaqstan, Pavlodar, Almaty, Jambyl, Qaraǵandy, Túrkistan, Qostanaı, Aqmola jáne Shyǵys Qazaqstan oblystarynda jumys isteıdi. Jaqyn arada joba elimizdiń taǵy bes óńirine taratylady. Osy bastamanyń arqasynda 300-den astam adam konsýltasııalyq qoldaý alǵan. Shalǵaıdaǵy eldi mekenderge barýdan basqa, mobıldi front-ofıster óńirlik kórmelerde, jármeńkelerde jáne iskerlik sharalarda jumys isteıdi. Kásipkerler tikeleı sol jerde keńes ala alady.
Semeıde mobıldik front-ofıs Ortalyq Arbattaǵy aýyl sharýashylyǵy taýar óndirýshileriniń kórmesi sheńberinde ornalastyryldy. О́ńir turǵyndary men kásipkerleri bıznesti memlekettik qoldaýdyń qoldanystaǵy baǵdarlamalarymen jáne qarjylandyrý quraldarymen tanysýǵa múmkindik aldy.
Talpyn Semey balalar bilim berý ortalyǵynyń basshysy Merýert Jumasheva jumystyń mobıldi formatynyń arqasynda alǵash ret memlekettik qoldaý sharalary boıynsha keńes alǵanyn atap ótti.
«Men jármeńkeni tamashalaýǵa kelip, ondaǵy mobıldi front-ofısti kórgende tań qaldym. Osyndaı is-sharalarda mamandardyń ózderiniń otyrýy óte yńǵaıly. Ýaqyt jumsamaı-aq keńes alýǵa bolady. Qazir biz bilim berý ortalyǵyn odan ári damytýdyń múmkindigin qarastyryp jatyrmyz. Sondyqtan men úshin qoldanystaǵy memlekettik qoldaý sharalary men qarjylandyrý quraldary týraly bilý mańyzdy», deıdi kásipker.
Jaqyn arada mobıldi front-ofıster bazasynda shaǵyn bızneske arnalǵan konsýltasııalyq-ońaltý ortalyqtaryn iske qosý josparlanýda. Kásipkerler damý, jobalardy keńinen taratý jáne bıznesti júrgizýde týyndaıtyn qıyndyqty eńserý máselesinde qoldaý ala alady.
Sondaı-aq Serik Jumanǵarın jumys sapary barysynda «Eurasia Agro Semey» JShS et óńdeý kesheni qurylysymen tanysty. Abaı oblysyndaǵy jańa et kombınaty aty ańyzǵa aınalǵan Semeı buqtyrylǵan et shyǵaratyn Qazaqstandaǵy eń iri kásiporyn bolady. Kásiporyndy bıyl iske qosý josparlanǵan.
Keshen Semeı qalasynan 18 shaqyrym jerde ornalasqan jáne mal qabyldaýdan bastap, shujyq ónimin, jartylaı fabrıkatty, et konservileri men delıkates ónimin shyǵarýǵa deıingi tolyq sıkldi vertıkaldyq ıntegrasııalanǵan kásiporyn bolyp sanalady. О́ndiristik qýattylyǵy 100 bas iri qara men jylqyny, sondaı-aq bir aýysymda 1 myń basqa deıin usaq maldy quraıdy. Kásiporynda 250 jańa jumys orny ashylady.
Kompanııa basshylyǵynyń aıtýynsha, jobalyq qýatqa shyqqannan keıin kásiporyn elimizdegi eń iri et óńdeý keshenine aınalady. Onyń turaqty júktemesin qamtamasyz etý úshin zaýyttyń aınalasynda tolyqqandy et klasteri qurylady. Munda fermerlik sharýashylyq, bordaqylaý alańy, jemshóp ósirýge arnalǵan sýarmaly jer jáne basqa da irgeles óndirister bar.
Jańa kásiporynnyń iske qosylýy Qazaqstannyń et óńdeıtin tarıhı ortalyǵynyń biri retinde Semeıdiń gastronomııalyq dańqyn jandandyrýǵa baǵyttalǵan.
Sapar sheńberinde Serik Jumanǵarın sonymen qatar «Qazaq-Astyq Group» JShS munaı ekstraksııa zaýytyn, «Agrolıder KAZ» JShS burshaq jáne maıly daqyldy qaıta óńdeý kásipornyn jáne oraý óniminiń kóptegen túrin shyǵaratyn «Qazpolıgraf» JShS-ni qosa alǵanda, óńirdiń birqatar qaıta óńdeý kásiporynyn aralady.
Budan soń Úkimet basshysynyń orynbasary óńirdiń fermerlerimen jáne kásipkerlermen kezdesýde bıznestiń mal sharýashylyǵyn júrgizý tásili túbegeıli ózgerýge tıis ekenin aıtty. Sondaı-aq ol oblys ekonomıkasy ósýiniń negizgi baǵyttarynyń biri retinde agroónerkásiptik keshen men mal sharýashylyǵyn damytýǵa basa nazar aýdardy.
Oblys ákimi Berik Ýálıdiń aıtýynsha, aýyl sharýashylyǵy óńirlik ekonomıkanyń negizgi draıveriniń biri bolyp qala beredi. 2025 jyldyń qorytyndysy boıynsha aýyl sharýashylyǵynyń jalpy óniminiń kólemi alǵash ret 583,8 mlrd teńgege jetip, eki jylda 1,4 esege ulǵaıdy. Aýyl sharýashylyǵy ónimderiniń jalpy kóleminiń jartysynan astamy – mal sharýashylyǵyna tıesili.
Kezdesýde salany jańǵyrtýǵa erekshe nazar aýdaryldy. Serik Jumanǵarın qazirgi zamanǵy mal sharýashylyǵy jańa tásilderdi, sıfrlandyrýdy jáne ozyq álemdik tehnologııalardy engizýdi talap etetinin atap ótti. Búginde memleket mal sharýashylyǵyn damytýǵa qomaqty qarajat bólip otyr, ol – jyldyq 6%-ben 220 mlrd teńge jeńildikti qarjylandyrý. Soltústik Qazaqstan oblysynyń tájirıbesin taratý baǵdarlamasy aıasynda bıyl óńirge taýarly sút fermalaryn salý jobasyna 7 mlrd teńge jeńildikpen qarjylandyrý bólindi. Alaıda, vıse-premer atap ótkendeı, bıznes tásilderi túbegeıli ózgerýge tıis.
«Biz myń jyl boıy mal sharýashylyǵymen aınalysqanymyzdy maqtan tutamyz. Biraq búgin sıfrlandyrý dáýiri keldi. Jaıylymdaǵy maldy bosatyp, onyń ózi salmaq qosýyn kútetin kezder ótti, bul tıimsiz. Mal ósirýdiń ozyq tehnologııalaryn, aýstralııalyq, kanadalyq tájirıbeni engizý qajet», dep atap ótti vıse-premer.
Aýyl sharýashylyǵy vıse-mınıstri Amanǵalı Berdalın kóktemgi egisti erte qarjylandyrý baǵdarlamasy aıasynda Abaı oblysynda 13,2 mlrd teńgege 176 fermer jeńildetilgen nesıe alǵanyn habarlady. Bul 125 myń gektar egis alqabyn qarjylandyrýmen qamtamasyz etýge múmkindik berdi.
Sharýalar úshin qaryz qarajatynyń qunyn tómendetý maqsatynda «Damý» qory arqyly qaryz somasynyń 85%-na deıingi mólsherde kepildik berý jalǵasady. Bul kredıtteý mólsherlemesin túpkilikti qaryz alýshylar úshin jyldyq 5% deńgeıinde ustap qalýǵa múmkindik beredi.
Sondaı-aq sharýalarǵa jyldyq stavkasy 6%-dan aspaıtyn aýyl sharýashylyǵy asyl tuqymdy mal basyn satyp alý úshin «Igilik» jáne «Bereke» jańa kredıttik ónimi usynyldy. Shalǵaıdaǵy mal sharýashylyǵyn qoldaý úshin jaıylymdyq ınfraqurylymdy damytýdy qarjylandyrýdy kózdeıtin «Jaılaý» biryńǵaı kredıttik ónimi iske qosylady.
Jeńildetilgen qarjylandyrýǵa qol jetkizýdi arttyrý úshin kredıtteý júıesine óńirlik áleýmettik-kásipkerlik korporasııalar qosyldy. Bul sharalardy júzege asyrý Mal sharýashylyǵyn damytýdyń keshendi josparynyń tolyqqandy oryndalýyn qamtamasyz etýge jáne salanyń jedel ósýine negiz jasaýǵa múmkindik beredi.
Sondaı-aq kezdesýde salyq ınnovasııalary talqylandy. Bıýdjettik josparlaýdy boljaý maqsatynda respýblıkalyq jáne jergilikti bıýdjetter arasyndaǵy korporatıvtik tabys salyǵyn (KTS) tóleýshilerdiń tizbesin úsh jyldyq kezeńge bekitý jáne aýdandardy qoldaý úshin jergilikti atqarýshy organdar boryshynyń lımıtterin qaıta qaraý usynysy jumysqa qabyldandy.
Abaı oblysy
