Jańaarqa aýdanyna qarasty Aınabulaq aýylynda boı kótergen jańa medısınalyq pýnkttiń ashylý saltanatyna aýdan prokýrorynyń orynbasary Jiger Maltıkov, aýdan ákiminiń orynbasary Áset Amanjolov, aýdandyq aýrýhananyń basshylyǵy men aýyl turǵyndary qatysty. Aýyl jurtshylyǵy úshin kópten kútken nysannyń ashylýy jergilikti turǵyndardyń qýanyshyn eseleı tústi.
Zamanaýı talaptarǵa saı salynǵan medısınalyq pýnkt qajetti qural-jabdyqtarmen tolyq qamtamasyz etilgen. Endi aýyl turǵyndary alǵashqy medısınalyq kómekti alý úshin aýdan ortalyǵyna sabylmaı, óz aýylynda sapaly medısınalyq qyzmetke qol jetkize alady.
Jalpy, aýdanda densaýlyq saqtaý ınfraqurylymyn jańǵyrtý jáne damytý jumystary kezeń-kezeńimen júzege asyrylyp keledi. Qazirgi ýaqytta bir feldsherlik-akýsherlik pýnkttiń, bes medısınalyq pýnkttiń jáne bir dárigerlik ambýlatorııanyń qurylysy tolyq aıaqtalyp, barlyq qajetti ruqsat qujattary rásimdelgen. Sondaı-aq medısınalyq qyzmet kórsetýge lısenzııalar alynǵan.
Budan bólek, Jańaarqa aýdandyq aýrýhanasynyń 90 oryndyq stasıonarlyq ǵımaratynda josparǵa sáıkes kúrdeli jóndeý jumystary júrgizilýde. Bul óz kezeginde aýdan turǵyndaryna kórsetiletin medısınalyq kómektiń sapasyn arttyrýǵa múmkindik beredi.
Osyndaı ıgi bastama Ulytaý aýdanynyń Sheńber aýylynda da jalǵasyn tapty. Munda da jańa medısınalyq pýnkt el ıgiligine berildi. Ashylý rásimine Ulytaý aýdany prokýrorynyń mindetin atqarýshy, ádilet keńesshisi Sábıt Serımbetov, Ulytaý oblystyq densaýlyq saqtaý basqarmasynyń basshysy Rústem Nysambaev, aýdan ákiminiń orynbasary Almaz Qaıyrbek jáne aýyl aqsaqaldary qatysty.
Ulytaý aýdanynda da densaýlyq saqtaý salasyn damytýǵa aıryqsha kóńil bólinip otyr. Keıingi jyldary aýdan kóleminde birqatar medısınalyq nysannyń qurylysy qolǵa alynyp, nátıjesinde toǵyz feldsherlik-akýsherlik pýnkt pen úsh medısınalyq pýnkttiń qurylysy tolyq aıaqtaldy. Qajetti qujattary rásimdelip, medısınalyq qyzmet kórsetýge lısenzııalar alyndy.
Sonymen qatar aýdan ortalyǵynda bir mezette 100 kelýshini qabyldaı alatyn jáne 20 tósektik orynǵa arnalǵan jańa aýdandyq aýrýhananyń qurylysy qarqyndy júrgizilip keledi. Qazirgi tańda qurylys jumysynyń 70 paıyzy aıaqtalǵan. Nysandy bıyl qarasha aıynda paıdalanýǵa berý josparlanyp otyr.
Jańadan ashylǵan qos medısınalyq pýnkt aýyl turǵyndarynyń ómir sapasyn arttyrýǵa baǵyttalǵan mańyzdy áleýmettik jobalardyń biri sanalady. Zamanaýı qural-jabdyqtarmen qamtylǵan nysandar halyqqa sapaly ári qoljetimdi medısınalyq qyzmet kórsetýge múmkindik beredi. Eń bastysy, turǵyndar alǵashqy medısınalyq-sanıtarlyq kómekti óz eldi mekeninde der kezinde alyp, densaýlyǵyna qatysty máselelerdi jedel sheshýge jaǵdaı jasalmaq.
Halyqtyń ál-aýqatyn arttyrýǵa jáne medısınalyq kómektiń qoljetimdiligin qamtamasyz etýge baǵyttalǵan mundaı mańyzdy jobalar aldaǵy ýaqytta da óz jalǵasyn taýyp, óńirdiń áleýmettik ınfraqurylymyn nyǵaıtýǵa qyzmet ete bermek.
