«Shý-Ulytaý» marafony bastaldy

TARAZ. 19 tamyz. Qazaq handyǵynyń 550 jyldyq mereıtoıyna oraı Almaty marafonshylar klýbynyń uıymdastyrýymen júzege asqan «Shý-Ulytaý» marafony Jambyl jerinde Shý qalasynan bastaý aldy. Bul týraly egemen.kz tilshisi habarlady. Marafonshylardyń maqsaty – Kereı men Jánibek han kótergen kók týdyń kóshirmesin ózderi mejelegen shaqyrymdardy júgirip ótken soń, Qazaqstan Tuńǵysh Prezıdentiniń murajaıyna tabys etý. Budan keıin marafonshylar Taraz qalasyna aıaq basyp, qala turǵyndary olarǵa sát-sapar tiledi. Marafonshylar arasynda Mekkege deıin júgirip baryp, qajylyq saparyn ótep kelgen Dýlat Imanǵazy da bar. Al, taǵy bir qatysýshy jambyldyq Janar Sembekuly 65 jasta eken. «Marafonnyń mańyzy úlken. Ortamyzda jas jigitter de bar.Dına Mergenbaeva degen jelaıaq qyz da osy is-sharaǵa qatysýǵa ynta bildirip, handyqtyń 550 jyldyq toıyna óz úlesin qosýda. Marafonshylardyń 11-i Almaty qalasynan. Jasy eń úlkeni menmin. Jasym 68-de. Biraq júgirgende jastardan qalysa qoımaımyn. Ol sportty jastaıymnan serik etkenimniń jemisi», – deıdi almatylyq marafonshy Marat Baltabaev. Marafonshylar Jambyl, Ońtústik Qazaqstan, Qyzylorda, Qaraǵandy oblysy aımaqtaryn basyp ótpek. Jalpy, 1500 shaqyrym jerdi júgirip ótetin jelaıaqtar 22 tamyz kúni Ulytaýǵa jetýdi josparlap otyr. Oralhan Dáýit. Derek, sýret: egemen.kz.