Italııany tańǵaldyrǵan, endi Parıjdi tamsandyrmaqshy

Jaqynda Italııanyń Lıdo Adrıano kýrortty qalasynda ótken ásemdik pen talanttar baıqaýyna dúnıeniń ár túkpirinen elýden asa jas talapkerler qatysty. Baıqaýdyń ereksheligi sol – júlde bireý boldy. Ony qostanaılyq “Trıýmf” balalar modasy teatrynyń kishkentaı músheleri Aıdana Bermuhambetova, Jazıra Jurqabaeva, Alına Muhamedjanova qanjyǵalaryna baılap qaıtty. Bizdiń kishkentaı arýlar sahnaǵa úsh ret shyqqan. Olar alǵashynda Qostanaı qalasyndaǵy “Hanym” sán atelesi tikken “Aqbota” kolleksııasynan qazaq qyzdarynyń ulttyq kıimin kórsetipti. Baıqaýǵa qatysýshylar men qonaqtar, bedeldi qazylar alqasy qos etek kóılek pen úkili bóriktiń, qamzoldyń ádemiligi men qazaq qolóneriniń qudiretine tańǵalypty. Qyzdardyń júldeni ıemdenýine osy ulttyq kostıýmge berilgen baǵa men qonaqtar yqylasy kóp yqpal etipti. Endi “Trıýmf” balalar modasy teatrynyń taǵy bir múshesi alty jasar Aıdana Omarova Fransııaǵa júrgeli otyr. Ol ataqty fransýz modeleri Per Kardenniń rezıdensııasynda ótetin halyqaralyq moda festıvaline qatyspaq. Bul joly da “Hanym” sán atelesi Aıdanaǵa arnap “Aqbota” kolleksııasynan ulttyq kostıým daıyndady. Keter kezde dızaıner Tatıana Taıshyqova Aıdanaǵa halqymyzdyń ónerin pash etip, tabyspen oralýyna tilek bildirdi. Názıra JÁRIMBETOVA, Qostanaı. Sýrette: Aıdana Omarova dızaıner Tatıana Taıshyqovamen birge.