Bir úmitker ótti, ekinshisi súrindi

Keshe Ortalyq saılaý komıssııasynda Qazaqstan Respýblıkasy prezıdenttigine kandıdattyqqa usynylǵan «Rýhanı qoǵam álemi» qoǵamdyq qorynyń prezıdenti Lımana Qoıshıeva men ýaqytsha jumyssyz Safıolla Aldajanov memlekettik tildi erkin meńgergendigin anyqtaý jónindegi Lıngvıstıkalyq komıssııaǵa synaq tapsyrdy. Lıngvıstıkalyq komıssııanyń tóraǵasy Myrzataı Joldasbekov synaq tapsyrýshy Lımana Qoıshıeva úsh kezeńnen turatyn synaqtyń tártibin túsindirgen soń, ol usynylǵan taqyryptardyń ishinen óz qalaýy boıynsha jazbasha jumysyna «Qazaq dástúriniń rýhanı qundylyqtary» degen taqyrypty tańdady. Onyń synaq tapsyrý ýaqyty bir jarym saǵatqa ǵana sozyldy. «Lımana Qoıshıevanyń synaq tapsyrý nátıjesi bylaı boldy, – dedi Lıngvıstıkalyq  komıssııanyń tóraǵasy Myrzataı Joldasbekov. – «Qazaq dástúriniń rýhanı qundylyqtary» degen taqyryptaǵy jazba jumysynda ol alty qate jibergen. Onyń bir qatesi emleden, eki qate tynys belgisinen, al úsh qate sóılem quraýdan ketken. Kandıdattyqqa usynylýshy L.Qoıshıevanyń jazba jumysynyń sapasy nashar bolǵan joq». Komıssııa tóraǵasynyń atap ótýinshe, synaq tapsyrýshy ekinshi kezekte Abaıdyń qara sózderin mánerlep oqýy tıis edi. Olardy úmitker qulaqqa da, janǵa da jaǵymdy etip, mánerlep oqyp bergen. «Abaıdyń qara sózderin naqyshyna keltirip oqý ońaı emes, – dedi Komıssııa tóraǵasy. – Úshinshisi erkin taqyryp retinde «Álem jáne beıbitshilik» degen taqyryp keldi. Úmitker bul taqyrypty da óte jaqsy áńgimelep berdi. Komıssııa músheleri rıza boldy. Nátıjesinde Lıngvıstıkalyq komıssııa Lımana Qoıshıeva memlekettik tildi erkin meńgergen degen qorytyndyǵa keldi». «Analar men arýlar atynan qazaq áıeliniń búgingi bolmysyn kórsetý maqsatym boldy, – dedi bizben suhbatynda Lımana Qoıshıeva. – Maǵan otbasym, týǵan-týystarym, dostarym senim artty. Olardyń senimin aqtaý men úshin óte mańyzdy. Otbasy da shaǵyn memleket deıdi ǵoı. Memlekettiń beriktigi – otbasynyń beriktiligi. Elbasynyń basshylyǵymen júzege asyrylyp jatqan is-sharalar men jumystardyń barlyǵyna óte rızamyn. Jalpy, men Prezıdentimizdiń júrgizip jatqan saıasatyn tolyq qoldaımyn, ózimdi Elbasyny jaqtaýshylardyń biri dep esepteımin». Lıngvıstıkalyq komıssııanyń synaǵynda oıdaǵydaı nátıje kórsetken Lımana Qoıshıeva kandıdattyqqa usynylǵan 10 adamnyń ishindegi jalǵyz áıel ekenin aıta ketkenimiz jón shyǵar. О́ıtkeni, qazaq halqy qyzdaryn árqashan qurmettegen ǵoı. Al ýaqytsha jumyssyz júr­gen kandıdattyqqa usy­ny­lý­shy Safıolla Aldaja­novtyń mem­lekettik tildi erkin meńgergendigi jó­nindegi synaq­qa qatysty jaz­ba jumysy da, máner­lep oqýy da, sóıleýi de Lıngvıs­tıka­lyq komıs­sııa múshelerin qanaǵattan­dyr­mady. Ony Komıssııa tóra­ǵasy Myr­zataı Joldasbekov atap kór­setti. «Aldajanovtyń «Qazaq han­dyǵynyń qaharmandyq shejiresi» taqyrybyna jazǵan jumysy saýatsyz jazylǵan, – dedi Komıssııa tóraǵasy synaq qorytyndysy jó­ninde. – 42 qate ketken, onyń ishinde emile qatesi – 17, tynys belgisi – 18, sóılem quraýy jaǵynan 7 qate jiberilgen. Oı júıesiz baıandalady. Qazaq handyǵy týraly kóp máselelerdi aıtýǵa bolady». Synaq tapsyrýshy ekinshi jáne úshinshi talaptarǵa da jóndi jaýap bere almady. «Jahandaný: úmit pen kúdik» taqyrybyn ózińiz tańdap aldyńyz. О́kinishke qaraı, jahandaný týraly uǵymyńyz óte taıaz bolyp shyqty. Sondyqtan Lıng­vıstıkalyq komıssııa Sa­fıol­la Qalabaıuly Aldajanov memle­kettik tildi erkin meńgermegen degen qorytyndyǵa keldi», – dedi M.Jol­dasbekov. Al synaq tapsyrýshy Lıng­vıs­tıkalyq komıssııanyń shyǵarǵan qorytyndysymen kelisti. «Rasynda da men jahandaný degenniń ne ekenin túsinbedim. Ol ekonomıkaǵa qatysty shyǵar», – dedi Safıolla Aldajanov bizben áńgimesinde. Álısultan QULANBAI, «Egemen Qazaqstan».