ASTANA. 7 naýryz. Búgin tennısten Devıs kýbogy aıasynda Astanada ótip jatqan Qazaqstan men Italııa arasyndaǵy tartys óz jalǵasyn tapty. Ekinshi jarys kúninde qarsylastar juptyq saıysta baq synap, ıtalııalyqtar 3:1 esebimen jeńiske jetti. Nátıjesinde, qos komanda arasyndaǵy aıqasta Italııa 2:1 esebimen alǵa shyqty. Bul týraly egemen.kz habarlady.
Jospar boıynsha ulttyq quramamyzdyń kapıtany Dıas Dosqaraev kortqa Andreı Golýbev pen Aleksandr Nedovesov jubyn shyǵardy. Al Italııa sapynan Fabıo Fonını men Paolo Lorenssı juby shyǵýy tıis edi. Alaıda, komanda kapıtany Korrado Barasýttı taktıkalyq ádis qoldanyp, P.Lorenssıdiń ornyna Sımone Bolellıdi shyǵardy.
Alǵashqy sette tennısshiler aıtarlyqtaı qatelikke boı aldyrmady. Bir-birden breık jasaǵan qarsylastar jeńimpazdy anyqtaý úshin taı-breıkke júgindi. Bul synda eki márte bizdiń tennısshilerdiń dobyn óz paıdalaryna jazǵan ıtalııalyqtar 7:6 (7:4) esebimen basym tústi.
Kelesi kezeńde Apenın túbeginen kelgen tennısshiler ońaı jeńiske jetti. Bar-joǵy 36 mınýttyń ishinde setti aıaqtaǵan olar óz paıdalaryna 6:3 esebin tirkedi.
Jankúıerler naǵyz tartysqa úshinshi sette kýá boldy. Ár soqqy úshin aıqasqan qarsylastar óz doptarynan upaı joǵaltqan joq. Nátıjesinde, set jeńimpazy taǵy da taı-breık arqyly anyqtaldy. Osy kezde ıtalııalyqtardyń alty márte tek setti emes, tutas oıyndy jeńispen aıaqtaýǵa múmkindigi bolǵan. Degenmen, Golýbev pen Nedovesov qaısarlyq tanytyp, bul kezeńdi jeńispen aıaqtady. 1 saǵat 9 mınýtqa sozylǵan sette qazaqstandyqtar 7:6 (15:13) esebimen basym tústi.
Al tórtinshi sette Bolellı men Fonını juby óz múmkindikterin múlt jibermedi. Bir márte breık jasaǵan olar kezeńde 6:4 esebimen jeńiske jetti.
Endi erteń komandalar eki jekeleı synda kúsh synasady. Aldymen Mıhaıl Kýkýshkın men Adreas Seppı kortqa shyqsa, ekinshi oıynda Andreı Golýbev pen Sımone Bolellı arasyndaǵy aıqasqa kýá bolamyz. Bizge Devıs kýbogynyń kelesi aınalymyna shyǵý úshin eki oıynda da jeńis qajet. Al eki kúnniń qorytyndysy boıynsha 2:1 esebimen alda kele jatyrǵan Italııaǵa erteńgi oıynnyń bireýin ǵana óz paıdasyna aıaqtasa jetkilikti.
Elaman Qońyr.
Derek: egemen.kz.
Sýret: daviscup.com.
