Úndistanda tobyr túrmedegi zorlyqshyny taspen uryp óltirdi

ASTANA. 7 naýryz. Úndistannyń Nagalend shtatyndaǵy Dımapýr qalasynda bir top adam túrmege basyp kirip, onda qyz zorlaǵany úshin otyrǵan Farıd Han esimdi adamdy taptap tastady. Bul týraly The New Indian Express basylymynyń habaryna súıengen Lenta.ru habarlady. Tobyr abaqtydan Bangladeshten zańsyz kelgen 35 jastaǵy azamatty syrtqa alyp shyǵyp, kóshemen tyr jalańash alyp ótti. Jurt oǵan jan-jaqtan tas jaýdyrdy. Osy tıgen soqqylardan zorlyqshy qaıtys boldy. Jazalaýdyń bul túrine tórt myńǵa jýyq adam qatysty. Shabýyl jasaýshylar budan basqa jolaı kem degende on kólik pen mashınany órtedi. Reuters habarlaǵandaı, polısııa júgensiz ketip bara jatqan tobyrdy atyspen ǵana toqtata alǵan. Nátıjesinde tobyr arasynan bir adam qaza tapqan. Qalada komendanttyyq saǵat jarııalanǵan. Tergeýdiń boljamyna qaraǵanda, Farıd Han aqpan aıynda naga taıpasynyń 20 jastaǵy qyzyn zorlaǵan. Bul sońǵy kezderi bolyp otyrǵan birinshi osyndaı oqıǵa emes. Qańtar aıynda alty erkek Kalkýttada japon týrıst qyzyn urlap áketip, jabylyp zorlaǵan. Qaraqshylar ony bir aı boıy tutqynda ustap otyrǵan degen boldjam bar. Sodan keıin qyz Bıhar shtatyndaǵy Bodh-Gaıa degen býdda hramyna barǵan. Úndistan ulttyq qylmystar tirkeý bıýrosyna sáıkes, elde ár kúni 93 áıel zorlyqqa ushyraıdy. Mundaı oqıǵalar sany 2012 jylǵy 25 myńnan 2013 jyly 33 myńǵa deıin jetken. Murat Aıtqoja. Derek, sýret: Lenta.ru.