Shekara qyzmetiniń eks-dırektory 11 jylǵa sottaldy

ASTANA. 7 naýryz. Qazaqstan shekara qyzmetiniń eks-dırektory Nurlan Jolamanov 11 jylǵa sottaldy. Onymen birge aıyp taǵylǵan burynǵy áskerı bólim komandıri Qaırat Balmaǵambetov qylmystyq jaýapkershilikten bosatyldy. Bul týraly Tengrinews.kz tilshisi habarlady. «Astananyń qylmystyq ister jónindegi mamandandyrylǵan aýdanaralyq áskerı soty Qazaqstan ulttyq qaýipsizdik komıteti shekara qyzmetiniń burynǵy dırektory Nurlan Jolamanovty 11 jylǵa bas bostandyǵynan aıyrýǵa úkim shyǵardy», - delingen habarlamada. Sot Jolamanovty «uıymdasqan qylmystyq top qurǵany» jáne «asa iri kólemde para alǵany» úshin aıypty dep tanydy. Ol jazasyn qatań tártiptegi qamaý kolonııasynda óteıtin boldy. Sot Jolamanovty ómir boıy memlekettik jaýapty qyzmet etý quqyǵynan aıyrdy. Sonymen birge sýdıa Qazaqstan prezıdentine Nurlan Jolamanovty general-leıtenant áskerı sheni men memlekettik nagradasy – ekinshi dárejeli «Dańq» ordeninen aıyrýdy usyndy. Buǵan deıin prokýror sottan Nurlan Jolamanovty 14 jylǵa bas bostandyǵynan aıyrýdy jáne dúnıe-múlkin tárkileýdi suraǵan. Aıyptalýshy ózine qarsy sotty «qoldan jasalǵan, saıası is» dep atap, taǵylǵan aıyptardy moıyndamaıtynyn málimdegen. Jolamanovpen birge sottalýshy – Almatydaǵy 2458-áskerı bólimniń burynǵy komandıri Qaırat Balmaǵambetovti sot qylmystyq jaýapkershilikten tolyq bosatyp, onyń dúnıe-múlkin qamaýdan bosatýǵa sheshim shyǵardy. Sot barysynda Balmaǵambetov ózine taǵylǵan «asa iri kólemde para alǵan» jáne «uıymdasqan qylmystyq top qurǵan» degen aıyptardy moıyndaıtynyn, bastyǵy Jolamanovtyń «yqpalynan shyǵa almaı» qylmysqa barǵanyn málimdegen. Jolamanov ustalǵan kúnnen bastap tergeý abaqtysynda qamaýda bolsa, Balmaǵambetov úı qamaǵynda ustalǵan. Sot búgin shyqqan úkim kúshine engen sátten bastap Balmaǵambetovti úıqamaqtan bosatý týraly qaýly etti. Aıyptaý derekteri boıynsha, 2013 jyldyń jazynan 2014 jylǵy qazannyń 27-ine deıin sol kezdegi UQK shekara qyzmetiniń dırektory Nurlan Jolamanov basqarǵan uıymdasqan qylmystyq top 173 mıllıon teńgeden asa (932 myń dollarǵa jýyq) aqshany para retinde alǵan. 2014 jyly qazannyń 27-si kúni tutqyndalǵan Nurlan Jolamanov byltyr jeltoqsanda Qazaqstan prezıdenti Nazarbaevqa jazǵan úndeýinde tergeýge senimsizdik bildirip, «arnaıy komıssııa quryp, oǵan UQK shekara qyzmetindegi jaǵdaıdy muqııat tekserýdi tapsyrýdy jáne qylmystyq isti tekserýdi ózge tergeý organyna júkteýge kómektesýdi» suraǵan edi. Nurlan Jolamanovtyń soty qańtardyń 26-sy kúni bastalǵan. Ol 2013 jyldyń qańtarynan bastap ustalǵan ýaqytqa deıin UQK shekara qyzmetin basqarǵan. Nurlan Jolamanovtyń isi – sońǵy jyldary UQK shekara qyzmetine qatysty shyqqan shýly oqıǵalar men janjaldy isterdiń kezekti birine aınaldy. Murat Aıtqoja. Derek, sýret: Tengrinews.kz.