ASTANA. 8 naýryz. Reseılik belgili oppozısıoner Borıs Nemsovtiń óltirilýine kúdikti retinde eki adam ustaldy. Bul týraly keshe Reseı federaldy qaýipsizdik qyzmetiniń dırektory Aleksandr Bortnıkov «Birinshi arnanyń» efırinen habarlady. «Kommersant» gazeti osylaı dep jazyp otyr.
Qaýipsizdik qyzmetiniń basshysy ustalǵandardyń aty-jónderin de aıtty. Olar – Anzor Gýbashev pen Zaýr Dadaev Soltústik Kavkaz ókilderi kórinedi. Famılııalaryna qaraǵanda, Sheshenstan men Kabardy-Malqar turǵyndaryna uqsaıdy. Tergeý Basman aýdandyq sotyna qolǵa túskenderdi qamaýǵa alý jóninde kepildeme berdi. Bul másele búgin qaralyp, sheshiledi. Sonymen birge áli olardyń sybaılastaryn taýyp, anyqtaýǵa týra keledi.
«Júrgizilgen jumystardyń nátıjesinde búgin atalmysh qylmysty jasaýǵa qatystary bar degen eki kúdikti – Gýbashev Anzor jáne Dadaev Zaýr degender ustaldy, bul jaıly memleket basshysyna baıandaldy», - dedi Bortnıkov myrza «Birinshi arnanyń» efırinen. Onyń sózine qaraǵanda, kúdiktiler Kavkaz aýmaǵynyń turǵyndary bolyp tabylady.
Kúdiktilerdiń ustalǵandary týraly aqpardy sondaı-aq Reseı tergeý komıtetindegiler de rastady. Tergeý komıtetiniń resmı ókili Vladımır Markınniń aıtýynsha, Anzor Gýbashev pen Zaýr Dadaev qylmysty uıymdastyrýǵa da, ony oryndaýǵa da qatystary bar delinip otyr.
«» málimeti boıynsha, FSB arnaıy jasaǵy men ishki ister mınıstrliginiń arnaýly toby senbige qaraǵan túni olardy qolǵa túsirip, birden Máskeýge jetkizgen. Osynda tergeý komıtetiniń tergeýshileri olardy qylmystyq jaýapqa tartý jóninde qaýly shyǵarǵan. Búgin komıtet Basman aýdandyq sotyna kúdiktilerdi qamaýǵa alý jóninde usynys berdi. Keıbir málimetter boıynsha, atalmysh qylmysty jasaýǵa birneshe adam qatysqan sııaqty.
Dúıim jurtty dúr silkindirgen kisi ólimi is júzinde tehnıkanyń kómegimen ashylǵan. Isti tergeýge qatysýshylar belgili saıasatkerdiń óltirilýiniń naqty sebebin bilmegendikten, negizinen qylmysty jasaýlary yqtımal kisilerdi izdestirýge kúsh salǵan. Bul úshin olar Moskvoresk kópiri ústindegi jáne kisi óltirýshini alyp ketken kóliktiń jolyndaǵy barlyq vıdeokameralardyń jazbalaryn birneshe kún boıy muqııat qaraıdy. Sodan keıin avtomobılge qatysty málimetterdi «Tasqyn» júıesine qosyp, onyń sońǵy birneshe kún ishinde júrgen marshrýttaryn anyqtaıdy. Osy jazbalar boıynsha Nemsov myrzany tikeleı óltirýshiniń de, ony alyp júrgen júrgizýshiniń de kimder ekenderin anyqtaýdyń oraıy keledi. Anyqtalǵan nátıjeler ólim bolǵan kúni túndegi uıaly telefondarda sóılengen sózderdi tekserip shyǵýǵa múmkindik beredi. Alynǵan materıaldardy taldaýdyń arqasynda quqyq qorǵaý organdarynyń qyzmetkerleri áýeli kıllerlerdiń kólikterin taýyp alady, sosyn onyń sońǵy ýaqyttary paıdalanǵan adamdardy anyqtaıdy. Olar Gýbashev jáne Dýdaev degender bolyp shyǵady. Keıbir aqparlarǵa qaraǵanda, olar qazirdiń ózinde ózderiniń osy ólimge qatystary bar ekenderin moıyndap qoıǵan sııaqty.
Jaqyn kúnderi tergeýshiler olardy kýálarǵa kórsetýdi josparlap otyr. Ondaǵy basty kýá – fotomodel Anna Dýrıskaıa qazirgi kúnderi Kıevte, anasynyń qasynda. Onyń advokaty qyzdyń Máskeýge shaqyrylatyn-shaqyrylmaıtynyn bilmeıtinin aıtty. Másele mynada, Ýkraınaǵa oralǵan boıda Anna ózine áldekimderdiń qoqan-loqqy jasaǵanyn aıtyp, mılısııaǵa shaǵymdanady. Osydan keıin ishki ister mınıstrligi ony qorǵaýǵa alady. Al Reseıde ol mundaı qorǵaýdan bas tartqan edi.
Alaıda, «» tilshisiniń málimeti boıynsha, atalǵan qylmysty oqıǵanyń fotomodelden basqa da birneshe kýágeri bar. Olardyń arasynan sol ýaqyttary kópirdiń mańaıynda kezdeısoq júrip qalǵan quqyq qorǵaý organdarynyń qyzmetkerleri de tabylady.
Murat Aıtqoja.
Derek, sýret: «Kommersant».
