Nemsovtyń ólimine kúdiktiler Ingýshetııada ustaldy

ASTANA. 8 naýryz. Reseıdiń oppozısııadaǵy belgili saıasatkeri Borıs Nemsovty óltirýge kúdiktiler keshe, 7 naýryz kúni Ingýshetııada qolǵa tústi. Bul týraly Ingýshetııa qaýipsizdik keńesiniń hatshysy Albert Barahaevtyń sózine silteme jasaǵan TASS habarlady. Onyń aıtýynsha, Anzor Gýbashev Malgobekten respýblıkanyń Malgobek aýdanyndaǵy Voznesenskaıa stanısasynda turatyn anasyna mashınamen kele jatqanynda ustalǵan. Al ekinshi kúdikti – Zaýr Dadaev Magas qalasynda qolǵa túsken. Qaýipsizdik keńesi hatshysynyń sózine qaraǵanda, Gýbashevtiń taǵy bir baýyry da osylarmen birge ustalǵan. Qaýipsizdik keńesindegiler Gýbashevtar men Dýdaevtardyń Voznesenskaıa stanısasyna 60-jyldary qonys aýdarǵan Sheshenstannyń Itým-Kaly aýdanynyń týmalary bolyp tabylatyndaryn aıtty. Barahaevtyń málimeti boıynsha, Anzor Gýbashev pen Zaýr Dadaevtyń Groznyıda úıleri bolǵan, qazir sonda turyp jatqan. Kúdiktilerdiń sońǵysy – Dadaev Sheshenstan ishki ister mınıstrliginiń «Sever» batalonynda on jylǵa jýyq ýaqyt qyzmet etken. Budan buryn saıasatker Nemsovty yqımal óltirýshiler 8 naýryzǵa deıin qamaýǵa alynyp qalatyny aıtylǵan bolatyn. «RPR-Parnas» partııasynyń teń tóraǵasy jáne Iаroslavl oblystyq dýmasynyń depýtaty Borıs Nemsov 27 aqpan kúnniń túninde, saǵat 23:30 shamasynda Máskeýdiń qaq ortasynda atyp óltirilgen edi. Janynda 23 jasar ýkraın fotomodeli Anna Dýrıskaıa bar saıasatkerdi bir aq tústi kólikten túsken belgisiz adam birneshe oq atyp, jantásilim etedi. Atylǵan 7-8 oqtyń tórteýi onyń arqasyna tıedi. Saıasatker 3 naýryz kúni Máskeýdiń Troekýr zıratyna jerlendi. Murat Aıtqoja. Derek, sýret: TASS.