Qazaqstan Devıs kýbogynyń shırek fınalyna shyqty

ASTANA. 8 naýryz. Devıs kýbogynyń 1/8 fınalynda Qazaqstan Italııany 3:2 esebimen jeńip, jarystyń shırek fınalyna shyqty. Bul týraly egemen.kz habarlady. Qos komanda arasyndaǵy sońǵy sheshýshi oıyn otandasymyz Aleksandr Nedovesov pen ıtalııalyq Fabıo Fonını arasynda ótti. Alǵashqy sette qarsylastar óz múmkindikteriniń barlyǵyn paıdalanyp, esepti 6:6-ǵa jetkizdi. Soǵan baılanysty jeńimpaz taı-breık arqyly anyqtalyp, Sasha bul synda 7:5 esebimen jeńiske jetti. Ekinshi jáne úshinshi set ıtalııalyqtyń basymdyǵymen ótti. Aldymen Fonını 2-kezeńdi 6:3 esebimen óz paıdasyna aıaqtap, tarazy basyn teńestirdi. Sondaı-aq, kelesi kezeńde 6:4 esebimen jeńgen ol jalpyesepte alǵa shyqty. Jergilikti jankúıerlerdiń qoldaýynan qýat alǵan Aleksandr 4-setti óte shıraq bastady. Nátıjesinde, 6:3 esebimen basym túsip, oıynnyń jalpyesebin 2:2-ge jetkizdi. Sheshýshi sette qarsylastar ár dop úshin aıqasyp, naǵyz tartystyń úlgisin kórsetti. Dál osy kezeńde bes márte breık jasalǵanyn aıta keteıik. Onyń úsheýi bizdiń tennısshiniń enshisine jazylsa, eki ret Fonını Sashanyń dobyn óz paıdasyna aıaqtady. Set qorytyndysy boıynsha Nedovesov 7:5 esebimen qarsylasynan aılasyn asyrdy. Sonyń nátıjesinde, oıynda 3:2 (7:6 (7:5), 3:6, 4:6, 6:3, 7:5) esebimen jeńiske jetip, komandamyzdy Devıs kýbogynyń kelesi aınalymyna alyp shyqty. Aıta keteıik, búginde Aleksandr ATR reıtınginde 130-orynda keledi. Al Fonını álemniń 22-raketkasy. Jarystyń shırek fınalynda Dıas Dosqaraev jattyqtyratyn ulttyq quramamyz Avstralııamen oınaıdy. О́z kezeginde, jasyl qurlyq ókilderi Chehııa tennısshilerinen 3:1 esebimen basym túsken bolatyn. Elaman Qońyr. Derek: egemen.kz. Sýret: daviscup.com.