Prezıdenttikke úmitker Turǵyn Syzdyqov ana tilin jetik biledi

ASTANA. 10 naýryz. Kommýnıstik halyq partııasy atynan kezekten tys prezıdent saılaýyna túsýge tilek bildirgen Turǵyn Syzdyqov memlekettik tildi jetik biletini belgili boldy. Bul týraly «24kz» habarlady. Lıngvıstıkalyq komıssııaǵa Qazaqstannyń kommýnıstik partııasy atynan kelgen kandıdat Turǵyn Syzdyqov dástúrli synaqtyń úsh kezeńinen ótkenin aıtqan komıssııa tóraǵasy M.Joldasbekov: «Birinshi synaqta «Bizdiń kúshimiz birlikte» degen taqyryptaǵy jazbasha jumys boldy. Taqyryp ashylǵan. 6 qate jiberipti. Onyń ishinde 3-eýi emle, 2-eýi tynys belgisi, 1-eýi stıldik qate.  Aıtaıyn degenim, L.Qoıshıevadan keıin saýatty, taqyryby ashylǵan jumys osy Syzdyqov myrzanyń jumysy boldy», – dedi. Komıssııa tóraǵasynyń aıtýynsha, ekinshi kezeńde kandıdat Baýyrjan Momyshulynyń prozasynan úsh bettik mátin oqyǵan. «Jaqsy oqydy. Biz oqyǵan mátindi túsindi me, túsinbedi me degen oımen  barlyq kandıdattarymyzǵa suraq qoıyp júrmiz. Kóbi ne oqyǵanyn bilmeıtin edi. Al endi Syzdyqov myrza óz oqyǵan mátindi óte ádemi jaqsylap aıtyp berdi», – dedi ol. Kandıdat úshinshi synaqta «Astana - táýelsizdik tuǵyry» taqyrybynda 15 mınýt sóz sóılegen. «Sátti taqyryp kelgen sııaqty. Jaqsy jaýap berdi. Sonymen bizdiń komıssııa músheleri rıza bolyp otyr. Qorytyndymyz,  Turǵyn Ysqaquly Syzdyqov memlekettik tildi erkin meńgergen», – dedi M.Joldasbekov. Úmitkerdiń ómirbaıanyna toqtala ketsek, Turǵyn Syzdyqov 1947 jyly Kókshetaý qalasynda týǵan. Joǵary bilimdi. Mamandyǵy – ǵalym-agronom. Aıta ketetin jaıt, Turǵyn Syzdyqov – partııa atynan emtıhan tapsyryp otyrǵan alǵashqy úmitker. Osy kúnge deıin lıngvıstıka komıssııasy aldyna tek ózin-ózi usynǵan azamattar kelgen bolatyn. Sonymen OSK bergen sońǵy málimetter boıynsha, ótinish bergen 14 úmitkerdiń ázirge tek ekeýi ǵana lıngvıstıkalyq komıssııa emtıhanynan ótti. Joldybaı Bazar. Derek, sýret: «24kz».