ASTANA. 10 naýryz. О́tken aptadaǵy kásipqoı boks álemindegi mańyzdy oqıǵalardyń biri Olımpııalyq oıyndardyń eki dúrkin chempıony, qytaılyq Szoý Shımınniń utylyp qalýy boldy. Bul týraly «Sport-Ekspress» gazetine silteme jasaǵan ras.kz habarlady.
Qazaqstandyq jankúıerler áli bul esimdi umyta qoımaǵan shyǵar dep oılaımyz. Ol kezinde áýesqoılar rınginde bizdiń biraz boksshynyń jolyn kesti. Sonyń ishinde Birjan Jaqypovpen talaı teń shaıqastyń ózinde ylǵı jeńisti alyp ketip júrdi. Biraq óziniń myqty bolǵanynan emes, udaıy tóreshilerdiń soǵan qaraı búıregi buryp turatyndyǵynan.
«Proýmoterler uzaq ýaqyt boıy ony qulaǵynan súırep júrip, kásipqoılar arasyndaǵy álem chempıony etpekshi boldy. Al senbi kúni ótken urystan olardyń qoldarynda tek onyń qulaqtary ǵana qaldy. Endi qaıtadan esh nátıje ákelmeıtin osy tirlikke kirisý úshin olarǵa qulaqty qaıtadan ornyna jalǵaýǵa týra keledi», - dep jazady basylym.
7 naýryz. Makao, Qytaı.
Amnat Rýenroeng (Taıland) Szoý Shımındi (Qytaı) upaı sanymen jeńip, óziniń IBF versııasy boıynsha 50,8 kg deıingi kategorııadaǵy álem chempıony ataǵyn saqtap qaldy.
«Kóptegen mamandar eki dúrkin Olımpııalyq oıyndar chempıony Szoý Shımındi kásipqoılar rıngine erterek kelýi kerek edi, sonda tabysqa ońaı jetetin edi, degendi aıtady. Alaıda, menińshe, ol tek kásipqoılar boksyna jaramaıtyn sııaqty. Munda soqqy jasaı bilmeseń, senen eshteńe kútýge bolmaıdy, seni eshqandaı aıaqtyń qozǵalysy qutqara almaıdy», - dep jazady tilshi.
Onyń pikirinshe, Shımın jónindegi shyndyqty jaqsy biletin promoýterler soqqyny eń az jasaıtyn boksshymen jekpe-jek shyǵaryp kórdi, biraq olımpııalyq chempıon munda da jer qaýyp qaldy.
Rýenroeng urystyń basynan qarsylasyn soqqynyń astyna alýǵa kiristi. Onyń soqqylary asa bir kúshti bolmaǵanymen, betten sıpap júrgendeı de bola qoıǵan joq. Taı boksshysy, ásirese, oń qolymen týralyp qatty uryp baqty.
Shaıqastyń sońynda tóreshiler bir aýyzdan jeńisti Rýengroenge berdi. Esep:
116-111.
Damır Qojamqul.
